पोखरा एभेन्जर्सले नेपाल प्रिमियर लिग (एनपीएल) को तेस्रो सिजनमा श्रीलंकाका विकेटकिपर ब्याटर सदिरा समिराविक्रमालाई अनुबन्ध गरेको छ ।
काठमाडौँ — पोखरा एभेन्जर्सले नेपाल प्रिमियर लिग (एनपीएल) को तेस्रो सिजनमा श्रीलंकाका विकेटकिपर ब्याटर सदिरा समिराविक्रमालाई अनुबन्ध गरेको छ ।
पोखराले तेस्रो सिजनमा आफ्नो पहिलो खेल खेल्नुअघि सदिरालाई भित्र्याउँदै टिम बलियो बनाएको छ । ३१ वर्षीय दायाँ हाते ब्याटर सदिरा समिराविक्रमाको आगमनले पोखरालाई ब्याटिङ र विकेटकिपिङमा पनि सहयोग पुग्ने टिमको विश्वास छ ।
सदिरा तेस्रो सिजनका लागि पोखराले अनुबन्ध गरेका तेस्रो श्रीलंकन र समग्रमा छैटौं विदेशी खेलाडी हुन् ।
पोखराले यसअघि नै दोस्रो सिजन पनि खेलेका श्रीलंकन ब्याटिङ अलराउण्डर धनञ्जय लक्षणलाई निरन्तरता दिँदा पेस बलिङ अलराउण्डर चमिका करुणारत्नेलाई तेस्रो सिजनका लागि अनुबन्ध गरिसकेको छ ।
यस्तै, पोखराले तेस्रो सिजनका लागि बंगलादेशबाट पनि तीन अलराउण्डर अनुबन्ध गरिसकेको छ । जसमा विश्वचर्चित अलराउण्डर शाकिब अल हसन सबैभन्दा ठूला खेलाडीका रूपमा अनुबन्ध भएका छन् भने पेस बलिङ अलराउण्डर मोहम्मद सैफुद्दिन र स्पिन बलिङ अलराउण्डर महेदी हसन पनि अनुबन्ध भएका छन् ।
विकेटकिपर ब्याटर सदिरा समिराविक्रमाले श्रीलंकाका लागि तीनवटै फर्म्याटमा खेलिसकेका छन् । उनले श्रीलंकाका लागि ९ टेस्ट, ५५ ओडीआई र १९ टी २०आई खेलिसकेका छन् ।
यस्तै, लंका प्रिमियर लिगमा उनले चार फरक टिमबाट खेलिसकेका छन् । उनी सन् २०२४ मा भएको टी२० विश्वकपमा श्रीलंकाको टिममा समावेश थिए ।
क्रिकेटको छोटो फर्म्याटमा उनी मिडल अर्डर ब्याटरका रूपमा खेल्ने गर्छन् । सदिरा मंगलबार नै नेपाल आइपुगिसकेका छन् ।
कुशल भुर्तेलको कप्तानीमा रहेको पोखरा एभेन्जर्सले बुधबार सुदूरपश्चिम रोयल्ससँग एनपीएल तेस्रो सिजनको पहिलो खेल खेल्दैछ ।
अनुभवी खेलाडीलाई निरन्तरता दिँदै स्थानीय युवा प्रतिभालाई पनि समेटेको पोखरा एभेन्जर्सले उत्कृष्ट विदेशी खेलाडी अनुबन्ध गर्दै टिम सन्तुलित बनाएको छ र पहिलो पटक एनपीएलको उपाधि जित्ने लक्ष्य राखेको छ ।
पोखराले यस पटक मुख्य प्रशिक्षकमा पनि परिवर्तन गर्दै श्रीलंकाका पूर्वक्रिकेटर अजन्था मेन्डिसलाई नयाँ मुख्य प्रशिक्षक बनाएको छ भने विदेशी खेलाडीमा पनि यस पटक नयाँ खेलाडी आएका छन् । यस्तै, भारतीय पूर्वक्रिकेटर तथा टी२० विश्वकप विजेता इरफान पठानलाई क्रिकेट एम्बासडर नियुक्त गरेको छ ।
