पहिलो खेलमा असेर्दी क्रिकेट क्लबलाई फ्रेन्ड्स ब्वाइज क्रिकेट क्लबले दुई विकेटले हरायो ।
पाल्पा — ‘पाल्पा च्याम्पियन्स ट्रफी’ जिल्लास्तरीय क्रिकेट लिग प्रतियोगिताअन्तर्गत सोमबार भएका दुई खेलमा फ्रेन्ड्स ब्वाइज क्लब र दमकडा क्रिकेट क्लब विजयी भएका छन् ।
जिल्ला क्रिकेट संघ, पाल्पा र दमकडा क्रिकेट क्लबको आयोजनामा भएको प्रतियोगिताअन्तर्गत पहिलो खेलमा असेर्दी क्रिकेट क्लबलाई फ्रेन्ड्स ब्वाइज क्रिकेट क्लबले दुई विकेटले हराएको छ । निर्धारित २० ओभरको खेलमा पहिले ब्याटिङ रोजेको असेर्दीले ७ विकेट गुमाएर १ सय १२ रन जोडेको थियो । असेर्दीका लागि सुमन पाण्डेयले ३१, रिसीराम जिटीले १७, माधव अधिकारीले १५ र विष्णु खड्काले १२ रन जोडे । अन्य खेलाडीले दोहोरो रन जोड्न सकेनन् भने असेर्दीले अतिरिक्त ३१ रन पायो । बलिङतर्फ फ्रेन्ड्स ब्वाइजका रोशन बस्याल, दिवस अर्याल, सफल भट्टराई र विप्लव जीसीले एक/एक विकेट लिए ।
जवाफी ब्याटिङमा फ्रेन्ड्सले निर्धारित २० ओभरको खेलमा ८ विकेट गुमाएर अन्तिम बलमा लक्ष्य पूरा गर्न सफल भयो । रोशन नेपाल र रोशन बस्यालले २२/२२ रन जोडे भने साहिद अली र सफल भट्टराईले १८/१८ रन जोडे । अन्य खेलाडीले दोहोरो रन जोड्न सकेनन् भने अतिरिक्त १५ रन पायो । बलिङतर्फ असेर्दीका माधव अधिकारी र प्रदीप अर्यालले दुई/दुई विकेट लिए भने नारायण अर्यालले एक विकेट लिए ।
अर्को खेलमा दमकडा क्रिकेट क्लबले न्यू एमएम सिटी क्लबलाई ९ रनले हराएको छ । निर्धारित २० ओभरको खेलमा पहिले ब्याटिङ रोजेको दमकडाले ९ विकेट गुमाएर १ सय ५३ रन जोडेको थियो । दमकडाका लागि विपिन भट्टराईले ४७, सागर बस्यालले ३०, केशव पाण्डेयले २७ र आशिष न्यौपानेले १० रन जोडे । अन्य खेलाडीले दोहोरो अंक जोडेनन् भने अतिरिक्त २४ रन पायो । बलिङतर्फ न्यू एमएम सिटी क्रिकेट क्लबका प्रवेश सारु मगर र हार्दिक बरालले ३/३, केशव रायमाझीले २ र सुशान्त पाण्डेयले एक विकेट लिए ।
जवाफी ब्याटिङमा न्यू एमएम सिटी ७ विकेट गुमाएर २० ओभरमा १ सय ४४ रनमै समेटियो । उसका लागि प्रशान्त पाण्डेयले ३०, स्वीकृत पौडेलले २७, केशव रायमाझीले २४, प्रवेश सारु मगरले २०, सुशान्त पाण्डेयले १४ र सन्दीप बानियाले १३ रन जोडे । बलिङतर्फ दमकडाका आशिष न्यौपानेले दुई तथा भुवन पाण्डेय, सुदीप गैरे र विपिन भट्टराईले एक/एक विकेट लिए ।
माधव अर्याल कान्तिपुरका पाल्पा संवाददाता हुन् ।
