छठको तयारी : सिरहाका बजारमा बढ्यो चहलपहल (तस्वीरहरू)

७ कात्तिक, सिरहा । लोकआस्था र श्रद्धाको पर्व छठ नजिकिँदै गर्दा सिरहाका बजारमा चहलपहल बढ्न थालेको छ ।

छठ पूजाका लागि आवश्यक बाँसका सामग्री खरिद गर्न सर्वसाधारण बजार पुग्न थालेका छन् ।

छठमा सूर्यदेवलाई अर्घ्य अर्पण गर्दा प्रयोग गरिने ढाकी, सुप, नाङ्लो र कोनियाजस्ता सामग्रीको किनमेल बढेसँगै बजारमा पर्वको रौनक देखिन थालेको हो ।

छठ पर्वमा बाँसबाट बनेका सामग्रीको धार्मिक तथा सांस्कृतिक महत्त्व रहेकाले पूजाको तयारीमा जुटेका परिवारको रोजाइमा यस्ता सामग्री पर्ने गरेका छन् ।

पर्व नजिकिएसँगै बाँसका सामग्री बिक्री गर्ने व्यापारीहरू पनि ग्राहकको प्रतीक्षामा छन् ।

बजारमा देखिन थालेको चहलपहलले छठको आगमनसँगै जिल्लामा पर्वको उत्साह बढ्दै गएको संकेत गरेको छ ।