शिल्पी नाट्य केन्द्रको आयोजनामा सुरु उत्सवमा नाटक, कविता, गजल, रेडियो नाटक र बालबालिकाका लागि कला कार्यशाला आयोजना भइरहेका छन्।
विराटनगर — पूर्व–पश्चिम राजमार्गसँगै जोडिएको मोरङको सुन्दरहरैंचा नगरपालिका–८, सलकपुर कला उत्सवमय बनेको छ । शिल्पी नाट्य केन्द्रको आयोजनामा सलकपुरस्थित ‘मुक्त रंगमञ्च’मा शुक्रबारदेखि सलकपुर कला उत्सव सुरु भएको हो ।
सोमबारसम्म चल्ने उत्सवको पहिलो दिन बिहान ८, ११ र दिउँसो २ बजे ‘च...च...हुँ...ई...’ प्रत्यक्ष रेडियो नाटक मञ्चन गरिएको थियो । त्यसपछि नगरप्रमुख केदारप्रसाद गुरागाईंले उत्सव उद्घाटन गरेका थिए । उद्घाटनपछि अपराह्न ‘कहाँ म हराएँ’ शीर्षकको नाटक मञ्चन गरिएको थियो । नाटकमा पवित्रा खड्का, संगीता उराउ, रविन परियार, गोविन्द ओली, सुमीत भण्डारी, सुहाना आचार्य, शुशिला विश्वकर्मालगायत कलाकारले अभिनय गरेका थिए ।
शनिबार ‘भुल्केमा कविता’ प्रस्तुतिसँगै साँझ ‘कहाँ म हराएँ’ नाटकको दोस्रो मञ्चन गरिएको थियो । कवि गोष्ठीमा बद्री भिखारी, रमेश रञ्जन झा, बादलदेवी चाम्लिङ, करुणा राई, रमेशचन्द्र अधिकारी, गगन योक्पाङ्देन, सिजन श्रेष्ठ, दीपा मग्राती र प्रयाग न्यौपानेले रचना वाचन गरे ।
आइतबार विद्यालयका बालबालिकाका लागि बिहान ११ र दिउँसो २ बजे ‘आर्ट वर्कसप’ आयोजना गरिएको थियो । सोही दिन दिउँसो ४ बजे ‘कहाँ म हराएँ’ नाटक तेस्रो पटक मञ्चन गरिएको थियो भने साँझ ५ बजे ‘जंगलमा गजल’ प्रस्तुत गरिएको थियो । कार्यक्रममा बाबु त्रिपाठी, उदय भट्टराई, बबिता भुजेल र रुपक वनवासीले गजल वाचन गरे ।
उत्सवको अन्तिम दिन सोमबार बिहान ‘च...च...हुँ...ई...’ प्रत्यक्ष रेडियो नाटकको दोस्रो मञ्चन हुनेछ । दिउँसो ३ बजे विद्यालयका बालबालिकाका लागि दोस्रो चरणको ‘आर्ट वर्कसप’ आयोजना गरिने आयोजकले जनाएको छ । साँझ ५ बजे गायिका एवं संगीत तथा नाट्य प्रतिष्ठानकी उपकुलपति झुमा लिम्बु र रैथाने ब्यान्डको प्रस्तुति रहनेछ ।
शिल्पी नाट्य केन्द्रका नाटक निर्देशक तथा अभिनेता घिमिरे युवराजले उत्सवमार्फत पूर्वमा कलाका लागि एउटा सानो प्रयासको थालनी गरिएको बताए । ‘सलकपुर कला उत्सवमार्फत नाटक, कविता, गजल, संगीत र अन्य सिर्जनात्मक गतिविधिलाई एउटै थलोमा जोड्ने प्रयत्न गरेका हौं,’ घिमिरेले भने ।
पर्वत पोर्तेल कान्तिपुर मिडिया ग्रुपका कोशी प्रदेश संवाददाता हुन् । उनी झापा र विराटनगर क्षेत्रबाट लेख्छन् ।
