उत्तरी तिब्बतको नाग्छु क्षेत्रमा गएको शक्तिशाली भूकम्पले ३३९ घर र २० पशु गोठ भत्काएको छ । भूकम्पपछि उद्धार तथा राहत कार्य जारी छ ।
काठमाडौँ — चीनको तिब्बत स्वायत्त क्षेत्रमा ७ म्याग्निच्युडको भूकम्प जाँदा कम्तीमा १६ जनाको मृत्यु भएको छ भने ७६ जना घाइते भएको सरकारी अधिकारीहरुले बताएका छन् ।
शुक्रबार सार्वजनिक विवरणअनुसार भूकम्पले उत्तरी तिब्बतको नाग्छु क्षेत्रमा ३३९ घर र २० वटा पशु गोठ भत्काएको छ ।
बिहीबार स्थानीय समयअनुसार राति १० बजेर ३३ मिनेटमा गएको भूकम्पको केन्द्रबिन्दु नाग्छु क्षेत्रको बाकेन काउन्टीमा रहेको थियो । अमेरिकी भूगर्भ सर्वेक्षणका अनुसार भूकम्पको गहिराइ करिब ११ माइल थियो ।
भूकम्पको केन्द्रबिन्दु आसपासको क्षेत्र समुद्री सतहबाट औसत ४ हजार ८६४ मिटर उचाइमा छ । यो सन् २०२४ जनवरीयताकै चीनमा गएको सबैभन्दा शक्तिशाली भूकम्प भएको रोयटर्सले जनाएको छ ।
भूकम्पपछि उद्धार तथा राहत कार्य जारी छ । उद्धारका लागि ३०० भन्दा बढी प्रहरी र क्षेत्रीय अग्नि तथा उद्धार सेवाका ३४७ जनशक्ति परिचालन गरिएको छ ।
सरकारी समाचार संस्था सिन्ह्वाका अनुसार १२ हजारभन्दा बढी मानिसलाई सुरक्षित स्थानमा सारिएको छ । प्रभावित क्षेत्रमा एक हजार अस्थायी आवास, तीन हजारभन्दा बढी पाल, खाट, सिरक र न्यानो कपडालगायत राहत सामग्री पठाइएको छ ।
भूकम्पका कारण केही क्षेत्रमा विद्युत् र सञ्चार सेवा अवरुद्ध भएका छन् । भूकम्पले क्षति पुर्याएका वा चर्किएका घर परकम्पका कारण भत्किन सक्ने जोखिम रहेको भन्दै अधिकारीहरूले सतर्कता अपनाउन आग्रह गरेका छन् । चीनको भूकम्प सञ्जाल केन्द्रका अनुसार भूकम्पपछि ४१३ परकम्प रेकर्ड गरिएका छन् ।
तिब्बत भूकम्पीय जोखिम भएको क्षेत्र हो । यसअघि सन् २०२५ जनवरीमा तिब्बतको टिङ्ग्री काउन्टीमा गएको भूकम्पमा कम्तीमा १२६ जनाको मृत्यु भएको थियो ।
.jpg)
