भारतमा ज्याला, रोजगारीको ग्यारेन्टी र सुरक्षाका लागि संघर्षरत नेपालीले यसपटक प्रधानमन्त्रीसमक्ष आफ्ना दुःख सुनाउने प्रत्यक्ष अवसर पाउने छैनन् ।
हरिश्चन्द्र बाग , कान्तिपुर संवाददाता , अमृता अनमोल
भारत बसाइँका क्रममा प्रधानमन्त्री वालेन्द्र शाहले त्यहाँका प्रधानमन्त्रीसहित उच्च तहका नेताहरुसँग भेट गर्नेछन् । भारत सरकारसँग केही राष्ट्रिय र द्विपक्षीय हितका विषयमा छलफल हुनेछ । तर करिब २५ घन्टाको बसाइमा नेपालमा काम र रोजगारी नपाएर भारत पुगेका नेपालीसँग प्रधानमन्त्रीले भेट गर्ने तालिका यसपटक छैन। यसकारण त्यहाँ काम गर्ने नेपाली श्रमिकको कुरा हामीले नै संकलन गरेका छौं ।
हरेक दिन देशका विभिन्न नाका हुँदै नेपालीहरु श्रमका लागि भारतका शहरहरु पुगिरहेका छन् । श्रमकै लागि कति नेपाली वर्षेनी भारत पुग्छन्, यसको कुनै हिसाब छैन । थोरै नेपालीले भारतमा सम्मानजनक व्यवहार र रोजगारी पाउँछन्, तर अधिकांस नेपाली श्रमिकको भने कथा फरक छ । नेपालबाट भ्रमणका लागि पु्ग्ने प्रधानमन्त्रीहरुको भारत सरकारले भव्य स्वागत गर्छ। तर श्रमका लागि भारत पुग्ने नेपालीले भने न त भनेको बेला ज्याला पाउँछन्, न कामकै ग्यारेन्टी हुन्छ ।
नेपाली भएकै कारण हेपिनुपर्ने र हिंसामा पर्नुपर्ने स्थितिमा छन् । प्रधानमन्त्री र प्रधानमन्त्रीसँग जाने भ्रमण दललाई त यात्रा पनि आरामदायी नै होला, नेपालीलाई भने आउन र जानकै पनि सास्ती छ। उनीहरु भन्छन्, सरकारले सके नेपालमै रोजगारी देओस्, नसके भारतमा रोजगारीको सुरक्षाको लागि भारतसँग कुरा गरिदेओस् ।
कञ्चनपुरको गड्डाचौकी नाकाबाट हरिशचन्द्र बाग, बाँकेको रुपडिया नाकाबाट रेजिना मल्ल र रुपन्देहीको बेलहिया नाकाबाट अमृता अनमोलले पठाएको यो रिपोर्ट हेरौं ।
हरिश्चन्द्र बाग कान्तिपुर टेलिभिजनका कञ्चनपुर संवाददाता हुन्।
अमृता अमृता अनमोल कान्तिपुर टेलिभिजनकी रुपन्देही संवाददाता हुन् । उनका रिपाेर्टिङ र लेख मुलत: महिला, बालबालिका र भुइँ तहका नागरिकका समस्यामा केन्द्रीत हुन्छन् ।