Trending
Prev Story
Next Story

आठपहरियाको वडाङ्मेट सुरु, शोक बिर्साउन बराहक्षेत्रको यात्रामा

Onlinekhabar •
November 20, 2026 • 12:00 PM
5
5 reads 0 reactions

६ मंसिर, धनकुटा । वर्षभरि आफन्त गुमाउँदाको शोक र पीडालाई धार्मिक तथा सांस्कृतिक विधिबाट बिसाएर नयाँ उत्साहका साथ जीवन अघि बढाउने मौलिक परम्परा बोकेको आठपहरिया समुदायको सबैभन्दा ठूलो चाड वडाङ्मेट (मंसिरे) पर्व सुरु भएको छ …

आठपहरियाको वडाङ्मेट सुरु, शोक बिर्साउन बराहक्षेत्रको यात्रामा

६ मंसिर, धनकुटा । वर्षभरि आफन्त गुमाउँदाको शोक र पीडालाई धार्मिक तथा सांस्कृतिक विधिबाट बिसाएर नयाँ उत्साहका साथ जीवन अघि बढाउने मौलिक परम्परा बोकेको आठपहरिया समुदायको सबैभन्दा ठूलो चाड वडाङ्मेट (मंसिरे) पर्व सुरु भएको छ ।

धनकुटा नगरपालिकामा मुख्य बसोबास रहेको आठपहरिया समुदायले आपसी सद्भाव, एकता र सांस्कृतिक पहिचानलाई आत्मसात् गर्दै विभिन्न धार्मिक तथा सांस्कृतिक गतिविधिका साथ पर्व मनाउन थालेको हो ।

वडाङ्मेट पर्वका अवसरमा वर्षभरि आमाबुबा वा परिवारका सदस्य गुमाएका समुदायका सदस्य शोकबाट मुक्त हुने धार्मिक परम्परा पूरा गर्न धनकुटाबाट सुनसरीको बराहक्षेत्रस्थित कोकाहा खोलासम्मको पैदल यात्रामा निस्किएका छन् । शनिबार धनकुटाबाट यात्रा सुरु गरेका उनीहरू चार दिनको पैदल यात्रापछि बराहक्षेत्र पुगेर पुनः धनकुटा फर्किने परम्परालाई निरन्तरता दिइरहेका छन् ।

आठपहरिया समुदायमा आफन्त गुमाउँदाको शोकबाट मुक्त हुने र वर्षभरि लागेको जुठोबाट चोखिने विशेष धार्मिक मान्यता छ । सोही मान्यताअनुसार परिवारका सदस्य गुमाएका व्यक्तिहरू बराहक्षेत्र नजिकैको कोकाहा खोलामा पुगेर कपाल र दाह्री खौरिने तथा स्नान गरी दुःख बगाउने गर्छन् ।

चारदिने पैदल यात्रामा निस्किएका आठपहरियाहरू पहिलो दिन धनकुटाको आहालेमा बास बसेका छन् । दोस्रो दिन आइतबार बराहक्षेत्रस्थित कोकाहा खोला पुगेर कपाल र दाह्री खौरिने, स्नान गर्ने तथा बराह भगवानको दर्शन गरी त्यहीँ बास बस्ने कार्यक्रम रहेको आठपहरिया समाजका केन्द्रीय उपाध्यक्ष सूर्य आठपहरियाले जानकारी दिए । धार्मिक विधि पूरा गरेपछि देवता घरमा ल्याउने परम्परासमेत रहेको उनले बताए ।

तेस्रो दिन सोमबार बराहक्षेत्रबाट फर्किने उनीहरू बेलुका धनकुटा नगरपालिकाको बगुवा खोलामा बास बस्नेछन् । मंगलबार धनकुटा आइपुग्ने उनीहरूको यात्राका क्रममा खुला आकाशमुनि नै बास बस्नुपर्ने चलन छ । अरूले बनाएका पार्टीपौवा तथा चौतारामा बास बस्न नहुने मान्यता रहेको छ ।

बुधबार धनकुटा नगरपालिकाका विभिन्न स्थानमा रहेका २२ वटा मार्गा थान मन्दिरमा भेला भएर विधिपूर्वक पूजा गर्ने परम्परा छ ।

वडाङ्मेट पर्व आफन्त गुमाउँदाको शोकबाट मुक्त हुने अवसर मात्र होइन, परिवारमा नयाँ खुसी र उपलब्धिको उत्सव मनाउने पर्वसमेत हो । मार्गा पूजा सम्पन्न भएपछि समुदायका सदस्यले घरघरमा दुःखको कर्म फुकाउने परम्परा पूरा गर्छन् । यस क्रममा वर्षभरि परिवारका सदस्य गुमाएका घरपरिवारले शोकसम्बन्धी परम्परागत विधि सम्पन्न गर्छन् । साथै, घरमा जेठो सन्तान जन्मिएको वा नयाँ घर निर्माण भएको अवसरमा हर्षबढाइ गर्दै आफन्त तथा छरछिमेकीलाई बोलाएर भोज खुवाउने र सामूहिक नाचगान गर्ने चलन छ ।

यो क्रम करिब १५ दिनसम्म चल्ने पुजारी उमेश आठपहरियाले जानकारी दिए । उनका अनुसार समुदायभित्रका हुम्बारक, छिर्लिङे र खावाडो गरी तीन पाछाका पुस्तागत डल्ले नाच तथा मारुनी नाच प्रदर्शन गरिन्छ । मारुनी नाच्ने कलाकारलाई पैसाको माला दान गर्ने चलनसमेत रहेको छ ।

धनकुटा नगरपालिकामा मुख्य बसोबास रहेको आठपहरिया समुदायले वर्षभरि तीनवटा प्रमुख चाड मनाउँछन् । वैशाखमा विशु, भदौमा न्वागी र कात्तिक वा मंसिरमा वडाङ्मेट पर्व मनाउने गरिन्छ । यी तीनवटै चाड मनाउन विश्वका जुनसुकै ठाउँमा पुगेका भए पनि मूल बसोबास क्षेत्र धनकुटा नै फर्किनुपर्ने मान्यता छ । समुदायले वडाङ्मेटलाई सबैभन्दा ठूलो र महत्वपूर्ण चाडका रूपमा लिने गरेका छन् । भाइटीकापछि उपयुक्त साइत जुराएर माङ्ला उठाएपछि वडाङ्मेट पर्व सुरु गर्ने चलन छ ।

धनकुटा नगरपालिकामा करिब ६ हजार आठपहरिया समुदायका मानिसको बसोबास छ । वडाङ्मेट पर्वका अवसरमा नगरपालिकाले मंसिर ८ र ९ गते सार्वजनिक बिदा दिएको छ ।

सहिदभूमिमा वाढाङ्मी (पापानी) को तयारी

धनकुटाको सहिदभूमि गाउँपालिकाको खाल्सा क्षेत्रमा बसोबास गर्ने राई समुदायको पापानी चाड पनि सुरु हुँदैछ । नयाँ बाली भित्र्याएको खुसीयालीमा मनाइने यो पर्व कात्तिक शुक्ल पूर्णिमापछिको पहिलो मंगलबार सहिदभूमि गाउँपालिका–३ स्थित साकेन्वा थानमा पूजा गरेपछि सुरु हुने परम्परा छ ।

यस वर्ष कात्तिक पूर्णिमा मंसिर ८ गते मंगलबार परेकाले सोही दिनदेखि पापानी चाड सुरु हुने स्थानीयवासी नरेन्द्र कश्चित राईले जानकारी दिए ।

पापानी पर्वमा किरात राई समुदायले कुलदेवताको पूजाआराधना गर्दै ढोल र झ्याम्टा बजाएर छ दिन छ रातसम्म नाचगान गर्छन् । एकअर्कासँग कुम जोडेर गोलो घेरामा खुट्टा तीन कदम अगाडि र पछाडि सार्दै नाच्नु यस पर्वको विशेषता हो । नयाँ बाली भित्र्याएको खुसी साटासाट गर्दै इष्टदेवताको पूजा र सामूहिक नाचगानका साथ पर्व मनाइन्छ ।

पर्वको पहिलो दिन गाउँभरिका गढी घरका ढोलहरू मूल पुजारीको घरमा भेला गरी पूजा गरेपछि पापानी सुरु हुन्छ । दोस्रो दिन घरघरमा देवीदेवता भित्र्याएर पूजा गर्ने र माङ्ला अर्थात् जोखाना हेर्ने चलन छ ।

पर्वको अन्तिमतिर इष्टदेवता फुढाहाङ (बुढाहाङ) को प्रतीक ङाङसुबाथिङको घर हुँदै गढी घर, पथ्थरे र मझियाको गढी घरमा पूजा गर्ने परम्परा छ । पापानी पर्वका अवसरमा सहिदभूमि गाउँपालिकाले मंसिर १३ र १४ गते सार्वजनिक बिदा दिएको छ ।

सहिदभूमि गाउँपालिकाका अधिकांश क्षेत्रमा वाढाङ्मी (पापानी) मनाउने राई समुदायको बसोबास छ ।

Prev Swipe Story Next

Same Story from Other Publications

Compare how 3 other independent news outlets reported on this story.

3 Publications
Ekantipur
1d ago
आठपहरियाको ठूलो चाड वडाङ्मी सुरु, जन्मदेखि मृत्युसम्मका सबै कर्म एउटै चाडमा

आठपहरियाको ठूलो चाड वडाङ्मी सुरु, जन्मदेखि मृत्युसम्मका सबै कर्म एउटै चाडमा

माङ्लाङ उठाएपछि सुरु भएको पर्वमा शोकबाट उक्सिने बराहक्षेत्र यात्रा, भोज, नाचगान र मौलिक संस्कृतिका कार्यक्रम एक महिनासम्म चल्नेछन्।

#आठपहरिया
Compare →
Nagarik News
1w ago
सर्लाहीको चक्रघट्टामा आज शोक बिदा, पालिकाले मृतक परिवारलाई जनही ५० हजार दिने

सर्लाहीको चक्रघट्टामा आज शोक बिदा, पालिकाले मृतक परिवारलाई जनही ५० हजार दिने

मकवानपुरको भीमफेदीमा भएको माइक्रोबस दुर्घटनामा गाउँपालिकाका नागरिकको मृत्यु भएपछि सर्लाहीको चक्रघट्टा गाउँपालिकाले आज शोक बिदा दिएको छ।

#शोक
Compare →
Hamro Patro News
1w ago
भीमफेदी दुर्घटनाले सुन्दरपुर शोकमा, एउटै परिवारका ६ जनाको मृत्यु

भीमफेदी दुर्घटनाले सुन्दरपुर शोकमा, एउटै परिवारका ६ जनाको मृत्यु

• छठ पर्व मनाउन घर फर्कंदै गरेका यात्रुहरूको गाडी भीमफेदीमा दुर्घटना हुँदा १४ जनाको मृत्यु भएको छ, जसमा १३ जना सुन्दरपुरका छन्। • दुर्घटनाले सुन्दरपुर गाउँमा शोकको माहोल सिर्जना गरेको छ, जहाँ परिवा…

#शोक
Compare →

Related Stories

Sports
Build #2612