कीर्तिपुरमा भएको फाइनलमा सुदूरपश्चिमले लुम्बिनी लायन्सलाई १० विकेटले हराउँदा मुन्सेले प्रतियोगिताकै सर्वाधिक व्यक्तिगत स्कोर बनाए।
काठमाडौँ — सुदूरपश्चिम रोयल्सलाई नेपाल प्रिमियर लिग (एनपीएल) को पहिलो उपाधि दिलाउन निर्णायक भूमिका खेलेका जर्ज मुन्सेले आफूलाई विश्वास गरेकोमा धन्यवाद दिएका छन्। त्रिवि अन्तर्राष्ट्रिय क्रिकेट रंगशाला, कीर्तिपुरमा भएको फाइनलमा सुदूरपश्चिमले लुम्बिनी लायन्सलाई सजिलै १० विकेटले हरायो।
लुम्बिनीले पहिले ब्याटिङ गर्दै ६ विकेट गुमाएर १ सय ५५ रन बनाएको थियो। जवाफमा सुदूरपश्चिमले विना विकेटको क्षति १ सय ५८ रन बनायो। त्यसमा मुन्सेले १ सय २५ रन बनाए। यो नै प्रतियोगिताको इतिहासमा उच्च व्यक्तिगत स्कोर रह्यो।
मुन्सेले भने, ‘आज मलाई भाग्यले पनि साथ दियो। टिमले हात पारेको सफलताका लागि म खुसी छु। सुदूरपश्चिमले केही दिनअघि एक्कासि कल गरेको थियो र खेल्ने प्रस्ताव राखेको थियो। त्यसलाई स्वीकार्दै म नेपाल आएँ।’
उनी प्लेअफ चरणका खेलका लागि मात्र नेपाल आएका थिए। स्कटल्यान्डका अर्का खेलाडी ब्रान्डन म्याकमुलेन घर फर्केपछि उनको स्थानमा सुदूरपश्चिमले मुन्सेलाई ल्याएको थियो। गत सिजन खराब प्रदर्शन गरेका मुन्सेले यसपटक भने सानदार प्रदर्शन गरे।
अन्ततः उनी नै फाइनलका निर्णायक खेलाडी साबित भए। उनले एनपीएलको पनि प्रशंसा गरे। उनले भने, ‘सबैभन्दा पहिले नेपाली क्रिकेटका समर्थकलाई धन्यवाद दिन चाहन्छु। नेपाली क्रिकेटको वातावरण नै जादुमयी छ। यो प्रतियोगिता आफैँमा उच्च छ।’
तस्बिर : हेमन्त श्रेष्ठ , अंगद ढकाल