नेपाल खेलकुद प्रतिष्ठान खोटाङले राष्ट्रिय खेलकुद प्रतियोगितामा स्वर्ण, रजत र कांस्य पदक जित्ने खेलाडीलाई क्रमशः ३३ हजार ३ सय ३३, २२ हजार २ सय २२ र ११ हजार १ सय ११ रुपैयाँ पुरस्कार दिने घोषणा गरेको छ ।
खोटाङ — प्रदेश र राष्ट्रिय खेलकुद प्रतियोगितामा पदक जित्ने खेलाडीलाई पुरस्कार दिने घोषणा गरिएको छ । बुधबार दिक्तेलमा आयोजित प्रदेश छनोटमा सहभागी हुने खेलाडीलाई पोसाक वितरण तथा बिदाइ कार्यक्रममा विभिन्न विधाका पदक विजेतालाई नगदसहित सम्मान गर्ने घोषणा गरिएको हो ।
नेपाल खेलकुद प्रतिष्ठान खोटाङले राष्ट्रिय खेलकुद प्रतियोगितामा स्वर्ण, रजत र कांस्य पदक जित्ने खेलाडीलाई क्रमशः ३३ हजार ३ सय ३३, २२ हजार २ सय २२ र ११ हजार १ सय ११ रुपैयाँ पुरस्कार दिने घोषणा गरेको छ । प्रदेशस्तरीय प्रतियोगितामा स्वर्ण, रजत र कांस्य पदक जित्ने करातेका खेलाडीलाई क्रमशः ५ हजार, ३ हजार र २ हजार रुपैयाँसहित सम्मान गरिने प्रतिष्ठानका अध्यक्ष सञ्जयकुमार राईले बताए ।
जिल्ला खेलकुद विकास समिति खोटाङले पनि विभिन्न विधामा पदक जित्ने खेलाडीलाई पुरस्कृत गर्ने घोषणा गरेको छ । समितिका अध्यक्ष मिलन कसजूका अनुसार प्रदेशस्तरीय प्रतियोगितामा व्यक्तिगततर्फ स्वर्ण, रजत र कांस्य पदक जित्ने खेलाडीलाई क्रमशः ४ हजार, ३ हजार र २ हजार रुपैयाँ दिइनेछ । समूहगत खेलतर्फ स्वर्ण, रजत र कांस्य पदक जित्ने टोलीलाई क्रमशः १५ हजार, १० हजार र ५ हजार रुपैयाँ पुरस्कार दिइनेछ ।
त्यस्तै, राष्ट्रिय प्रतियोगितामा व्यक्तिगततर्फ स्वर्ण, रजत र कांस्य पदक जित्ने खेलाडीले क्रमशः १० हजार, ७ हजार र ५ हजार रुपैयाँ पाउनेछन् । समूहगत खेलमा पदक जित्ने टोलीलाई क्रमशः ३० हजार, २० हजार र १० हजार रुपैयाँ दिइनेछ । राष्ट्रिय प्रतियोगितामा पहिलो, दोस्रो र तेस्रो स्थान हासिल गर्ने संघलाई क्रमशः ५० हजार, ४० हजार र ३० हजार रुपैयाँसहित सम्मान गरिने कसजूले बताए ।
खोटाङ यातायात प्रालिले प्रदेश छनोटमा सहभागी हुन जाने खेलाडीलाई भाडामा २० प्रतिशत छुट दिने भएको छ । राष्ट्रिय खेलकुद प्रतियोगितामा पदक जित्ने खेलाडीलाई दुई वर्षसम्म यातायात भाडामा ५० प्रतिशत छुट दिइनेछ । यससम्बन्धी सम्झौता जिल्ला खेलकुद विकास समिति र खोटाङ यातायात प्रालिबीच भएको कसजूले बताए ।
खोटाङबाट १६ खेलका २०३ खेलाडी प्रदेशस्तरीय प्रतियोगितामा सहभागी हुनेछन् । उनीहरूसँगै ३१ जना प्रशिक्षक र व्यवस्थापक पनि सहभागी हुनेछन् ।
डम्बरसिं राई कान्तिपुरका खोटाङ संवाददाता हुन् ।