टस जितेर पहिले ब्याटिङ गरेको कर्णालीले आठ विकेट गुमाउँदै १५३ रन बनायो, जबकि तलत ३३ बलमा ५१ रनसहित नटआउट रहे।
हसन तलतको अर्धशतकको मद्दतले कर्णाली याक्सले नेपाल प्रिमियर लिग (एनपीएल) तेस्रो सिजनको आफ्नो अन्तिम लिग खेलमा चितवन राइनोजसामु पहिले ब्याटिङ गर्दै १ सय ५४ रनको लक्ष्य प्रस्तुत गरेको छ ।
कर्णालीले टस जितेर पहिले ब्याटिङको निर्णय गरेको हो र यसक्रममा आठ विकेट गुमाएर १ सय ५३ रन बनाउन सफल रह्यो । तलतले ३३ बलको सामना गरेर ५१ रन बनाए र नटआउट पनि रहे ।
त्यसमा दुई चौका र तीन छक्का सामेल थियो । अर्का नटआउट ब्याटर नन्दन यादवले दुई रन बनाए । यसअघि ओपनर सचिन शर्मा शून्यमै आउट भए भने दीपक डुम्रेले पनि सात रन मात्र बनाए ।
कप्तान डेविड मिलरले पनि खासै ठूलो योगदान दिन सकेनन् । उनी पाँच रन बनाएर आउट भए । अर्को ओपनर अरिफुल इस्लामले भने १५ बलमा ३५ रन बनाए । उनले चार चौका र दुई छक्का प्रहार गरे ।
सोमपाल कामीले चार र मार्क वाटले छ रनको मात्र योगदान गरे । गुल्सन झाले भने ६ बलमा १८ रन जोडे । प्रतियोगितामा कर्णालीको प्लेअफमा पुग्ने सम्भावना यसअघि नै समाप्त भइसकेको छ ।
चितवनको भने प्लेअफ खेल्ने यसअघि नै तय भइसकेको हो ।
