विराटनगर किंग्सलाई ४ विकेटले पराजित गर्दै साविक विजेता लुम्बिनी लायन्स नेपाल प्रिमियर लिग (एनपीएल) को क्वालिफायरमा प्रवेश गरेको छ । यसअघि नै प्लेअफमा स्थान पक्का गरिसकेको लुम्बिनीले लिग चरणमा ७ खेलबाट ११ अंक जोड्दै शीर्ष स्थानमा उक्लिएको छ र शीर्ष दुईमा रहने पक्का भएको हो ।
विराटनगर किंग्सले दिएको १६७ रनको लक्ष्य पछ्याएको लुम्बिनीले १९.५ ओभरमा ६ विकेट गुमाएर पूरा गरेको हो । लुम्बिनीले विराटनगरलाई पराजित गरेपछि प्लेअफमा पुग्ने चारै टोलीको टुङ्गो लागेको छ । लुम्बिनी र सुदूरपश्चिमसँगै काठमान्डु गोर्खाज र चितवन राइनोजले पनि प्लेअफमा स्थान बनाएका छन् । काठमान्डु ५ खेलबाट ८ अंकसहित तेस्रो र चितवन ६ खेलबाट ७ अंकसहित चौथो स्थानमा छ । लिग चरणको ७ वटै खेल खेलिसकेको विराटनगर भने यो हारपछि ६ अंकसहित पाँचौ स्थानमै सिमित रह्यो र लिग चरणबाट बाहिरियो । कर्णाली याक्स, जनकपुर बोल्ट्स र पोखरा एभेन्जर्स यसअघि नै प्लेअफ होडबाट बाहिरिसकेका छन् ।
लुम्बिनीलाई जितका लागि अन्तिम दुई ओभरमा ३२ रन आवश्यक थियो । सन्दिप जोराले १९औं ओभरमा विराटनगरका इसुरु उडानालाई दुई छक्का र एक चौका गर्दा १७ रन जोडे । अन्तिम ओभरमा १६ रन आवश्यक रहेको बेला लुम्बिनीका अली शेखले विराटनगरका रुपेश सिंहलाई पहिलो बलमै छक्का प्रहार गरे । उक्त बल नो बल भएपछि शेखले थप फ्रि हिटमा २ रन पनि थपे । त्यसपछि दोस्रो बलमा अली र तेस्रो बलमा सन्दिप जोराले १–१ रन लिए ।
चौथो बलमा ठूलो सट खेल्ने धुनमा अली शेख इसुरु उडानाबाट क्याचआउट भए । लुम्बिनीलाई जितका लागि २ बलमा ५ रन आवश्यक हुँदा क्रिजमा आएका रुबेन ट्रम्पलम्यानले रुपेश सिंहलाई छक्का प्रहार गर्दै लुम्बिनीलाई रोमाञ्चक जित दिलाए । लुम्बिनीका लागि ओपनरद्वय डार्शी सर्ट र आसिफ शेखले समान ४५ रन बनाए । पहिलो विकेटका लागि यो जोडीले ११.५ ओभरमा ८६ रनको साझेदारी गरेका थिए । तर दुवै खेलाडी बउट भएपछि लुम्बिनीले नियमित अन्तरालमा विकेट गुमायो । निरोशन डिकवेला र दिलिप नाथ खाता नखोली आउट भए भने कप्तान रोहित पौडेल ९रन बनाएर रनआउट भए । विराटनगरका अपराजित पौडेलले १३औं ओभरमा डिकवेला र नाथलाई लगातार आउट गरेपछि विराटनगरले खेलमा पुनरागन गरेको थियो ।
यसै खेलबाट एनपीएलमा डेब्यु गरेका अमेरेकी अलराउण्डर अली शेख र सन्दिप जोराले छैटौं विकेटका लागि ४२ रनको महत्वपूर्ण साझेदारी गरे । शेरखले १९ बलमा १ चौका र २ छक्का मदतमा २७ रन योगदान गरे । जोराले आक्रमक ब्याटिङ गर्दै ११ बलमा १ चौका र ३ छक्का मदतमा अविजित २५ रन जोडे । ट्रम्पलम्यानले १ बलमै छक्का प्रहार गर्दै लुम्बिनीको जित पक्का गरेका थिए ।
बलिङमा विराटनगरका लागि अपराजित पौडेलले २ र चरित असलंका र रुपेश सिंहले १–१ विकेट लिए । त्यसअघि कीर्तिपुरस्थित टीयू मैदानमा टस हारेर पहिले ब्याटिङ गरेको विराटनगरले चरित असलंकाको अर्धशतक मदतमा निर्धारित २० ओभरमा ४ विकेट गुमाएर १६६ रन बनाएको थियो ।
विराटनगरका लागि असलंकाले ४३ बलमा १ चौका र ६ छक्का प्रहार गर्दै सर्वाधिक ६४ रन बनाए । शुभम रन्जानेले २४ बल खेल्दै ४ चौका मदतमा अविजित ३१ रन बनाए । ओपनर इमरान शेख २४ रन बनाएर रिटायर्ट हर्ट भए । अर्का ओपनर लोकेश बमले १७ बलमा १५ रन जोडे । शेहान जयासूर्या १ र इसुरु उडाना ६ रनमा आउट भए । विराटनगर ७०–१ को अवस्थामा हुँदा ओपनर इमरान शेख रिटायर्ड हर्ट भएका थिए । त्यसपछि क्रिजमा आएका शुभम रन्जालेसँग मिलेर असलंकाले ७५ रनको साझेदारी गरे । बलिङमा लुम्बिनीका लागि किशोर महतो, रुबेन ट्रम्पलम्यान र अभिशेष गौतमले १–१ विकेट लिए । किशोरले ४ ओभरमा २४ रन मात्र खर्चिँदा अभिशेषले ३ ओभरमा १५ रन मात्र खर्चिए । ट्रमपलम्यान भने महँगा बने । उनले ४ ओभरमा ५२ रन खर्चिए ।
