एक पुरुष र १९ महिला कैदीबन्दीले कारागारभित्रै छठ मनाउन लागेका हुन् । उनीहरूको धार्मिक आस्थाको सम्मान गर्दै पर्व मनाउन छुट दिइएको कारागारले जनाएको छ ।
वीरगन्ज — वीरगन्ज कारागारमा यस वर्ष २० कैदीबन्दीले छठ पर्व मनाउँदै छन्। विभिन्न मुद्दामा कैद सजाय भुक्तान गरिरहेका एक पुरुष र १९ महिला कैदीबन्दीले कारागारभित्रै छठ पर्व मनाउन लागेका हुन्।
कारागारका निमित्त जेलर देवनाथ साहका अनुसार कैदीबन्दीको धार्मिक आस्थाको सम्मान गर्दै उनीहरूलाई कारागारभित्रै छठ पर्व मनाउने व्यवस्था मिलाइएको हो। महिला र पुरुष कैदीबन्दीका लागि छुट्टाछुट्टै रूपमा पर्व मनाउने प्रबन्ध गरिएको उनले बताए। कैदीबन्दीले शान्तिपूर्ण र श्रद्धापूर्वक छठ पर्व मनाउन कुनै रोकटोक नगरिएको साहले जानकारी दिए।
कैदीबन्दीलाई यो पर्व मान्न सरकारले छुट्टै आर्थिक सुविधा भने उपलब्ध गराउँदैन ।
यसैबीच, रुङ्टा वेलफेयर सोसाइटीले छठ पर्व मनाउन लागेका कैदीबन्दीलाई आवश्यक सामग्री सहयोग गरेको छ। संस्थाले उनीहरूलाई पिठो र सारी उपलब्ध गराएको हो। कारागारभित्रै धार्मिक विधिअनुसार छठ मनाउने व्यवस्था भएपछि कैदीबन्दीले पनि आफ्नो आस्था र परम्परालाई निरन्तरता दिन पाएका छन्।
शंकर आचार्य कान्तिपुरका पर्सा संवाददाता हुन् ।
