घोराही–१२ बेलघारका २३ वर्षीय अनुप चौधरी बिहीबार नुहाउने क्रममा डुबेर बेपत्ता भएका थिए ।
दाङ — घोराही उपमहानगरपालिका–१० अर्घुस्थित सिँचाइ ड्याममा नुहाउने क्रममा डुबेर बेपत्ता भएका युवकको शव २२ घण्टापछि शुक्रबार फेला परेको छ ।
सशस्त्र प्रहरी बल नेपालको गोताखोर टोलीले उनलाई उद्धार गरेको हो । बिहीबार दिउँसो साथीहरुसँग नुहाउन गएका घोराही–१२ बेलघारका २३ वर्षीय अनुप चौधरी ड्याममा डुबेर बेपत्ता भएका थिए ।
नेपाल प्रहरी, सशस्त्र प्रहरी र नेपाली सेनाको टोलीले बिहिबारदेखि नै लगातार खोजी गर्दा पनि चौधरी फेला परेका थिएनन् । सशस्त्र प्रहरी बल, नेपाल नं. ४२ रिजर्भ गण हेडक्वार्टर शमसेरगन्ज बाँकेको प्रदेश स्तरिय विपद् ब्यवस्थापन टोलीले शुक्रबार बिहानैदेखि खोजी गरेको थियो ।
सशस्त्र प्रहरी निरिक्षक आशिष रावतको नेतृत्वमा विशेष तालिम प्राप्त गोताखोर टोली ड्याममा पसेर चौधरीको खोजी गरेको थियो । गोताखोर टोलीले चौधरीको शव ३० फिट गहिरो ड्याममा माटोमा गडिएको अवस्थामा फेला पारेको सशस्त्र प्रहरी बल नं. २९ गण हेड क्वार्टर ज्वालामाई दाङका प्रमुख एसपी यदुकुमार कार्कीले जानकारी दिए ।
दुर्गालाल केसी कान्तिपुरका दाङ संवाददाता हुन् ।
