भीमफेदी दुर्घटनाः मृतकको संख्या ११ पुग्यो

काठमाडौं–हेटौंडा सडकमा माइक्रोबस दुर्घटना हुँदा तीन महिला, दुई बालिका र ६ पुरुषको मृत्यु भएको छ। घटनामा ६ जना घाइते, दुई डिस्चार्ज, तीन जना अझै हराइरहेको घाइते र पीडितको दाबी छ।

हेटौंडा — भीमफेदी–कुलेखानी–काठमाडौं सडकको भीमफेदी गाउँपालिका—६ चिसापानी गढीमा भएको विद्युतीय माइक्रोबस (इभी) दुर्घटनामा थप एक जनाको मृत्यु भएको छ । योसँगै दुर्घटनामा मृत्यु हुनेको संख्या ११ पुगेको छ ।

मृत्यु हुनेमा तीन महिला, दुई बालिका र ६ जना पुरुष रहेका छन् । उनीहरुको घटनास्थलमै मृत्यु भएको हो । मृतकमध्ये गाडी चालकसहित दुई जनाको पहिचान खुलेको छ । अरु नौ जनाको पहिचान खुल्न सकेको छैन । चार जनाको शव हेटौंडा अस्पतालमा ल्याइएको छ भने सात शव केहीबेरअघि चिसापानी गढीको सडकमा निकालिएको छ । ती शव हेटौंडा अस्पतालमा ल्याउने काम भइरहेको जिल्ला प्रहरी कार्यालय मकवानपुरमा एसपी श्याम खत्रीले बताए । ‘सिस्नोघारी, भीर र झाडी भएकाले घाइतेको उद्धार र भेटिएका शव सडकमा निकाल्न नै कठिनाई भयो,’ उनले भने ।

दुर्घटनाका ६ जना घाइतेलाई उपचारका लागि हेटौंडा अस्पताल ल्याइएको थियो । दुई जना डिस्चार्ज भइसकेका छन् । तीन बालबालिकासहित चार जनाको उपचार भइरहेको प्रहरीले जनाएको छ । घाइते मुकेश यादव र मृुतकका आफन्तहरुले गाडीमा बालबालिकासहित २० जना रहेको बताएका छन्  । तर अहिलेसम्म मृतक र घाइते गरेर १७ जनामात्र फेला परेका छन् ।

बिहीबार बिहानैदेखि नेपाल प्रहरी, नेपाली सेना, सशस्त्र प्रहरी, ट्राफिक र स्थानीयवासीसहित गरेर सय जना भन्दाबढी घाइतेको खोजी र उद्धार गरिरहेका छन् । सुरक्षाकर्मीले अझै पनि खोजी गरिरहेका छन् । ‘भिरालो झाडीसहितको भीर भएकाले  खोजी गर्न कठिनाई भइरहेको छ । खोजी गर्दा आफैं भीरबाट खसिएला भन्न डर छ,’ एक सुरक्षाकर्मीले भने ।

मृतकका आफन्त पनि घटनास्थलमा पुगेका छन् । उनीहरुको पनि गाडीमा २० जना रहेको दाबी गरेका छन् । उक्त माइक्रोमा बिहान ४ बजे फर्पिङ प्रहरी चौकीमा ११ जनामात्र यात्रु रहेको चालकले टिपाएका छन् । ‘साना बालबालिकाको संख्या नटिपाएको हुनसक्छ । यसले यात्रुको संख्या नै एकिन हुन सकेको छैन,’ एसपी खत्रीले भने। उनी आफैं घटनास्थल पुगेर खोजी र उद्धारमा खटिएका छन् ।

मृतकहरु सर्लाही चक्रघट्टा गाउँपालिका—४ सुन्दरपुर टोलका रहेका छन् । काठमाडौंबाट हेटौंडातर्फ आउँदै गरेको मधेश प्रदेश ०३—००१ ज ०८८० विद्युतीय माइक्रो बिहान पौने ६ बजेतिर चिसापानीगढीमा सडकबाट करिब ७ सय मिटर तल खसेको हो । घटनास्थल इलाका प्रहरी कार्यालय भीमफेदीबाट आठ किलोमिटर उत्तरमा पर्छ ।

प्रताप विष्ट कान्तिपुरको हेटौडा संवाददाता हुन् । उनी स्थानिय राजनीतिक र सामाजिक मुद्धाबारे रिपोर्टिङ/टिप्पणी लेख्छन् ।