एनभिडियाका सीईओमाथि अनुसन्धान

राष्ट्रिय सुरक्षा वा गोप्य सूचना चुहावटको प्रमाण नदेखिए पनि चीनसँगको कारोबारबारे अमेरिकी सांसदहरूले सीईओसँग जवाफ मागेका छन्।

काठमाडौँ — अमेरिकी चिप निर्माता कम्पनी एनभिडियाले प्रमुख कार्यकारी अधिकृत (सीईओ) जेनसेन हुआङमाथि अनुसन्धान थालेको छ । चिनियाँ गुप्तचर निकायका लागि काम गरेको आरोप लागेकी महिलासँग अन्तरंग सम्बन्ध रहेको हुआङले स्वीकार गरेपछि कम्पनीको सञ्चालक समितिले अनुसन्धान अघि बढाएको अलजजिरा ले उल्लेख गरेकाे छ ।

आइतबार जारी विज्ञप्तिमा कम्पनीले स्वतन्त्र सञ्चालकहरूको समितिले बाह्य कानुनी सल्लाहकारको सहयोगमा अनुसन्धान गर्ने जनाएको छ । राष्ट्रिय सुरक्षा वा कम्पनीका गोप्य सूचना चुहिएको कुनै आधार नरहेको जनाउँदै समितिले उपलब्ध सबै सूचनाको अध्ययन गर्ने बताएको छ । अनुसन्धान अवधिमा पनि हुआङले नै कम्पनीको नेतृत्व गर्नेछन् ।

गत अक्टोबर २९ मा न्युयोर्क टाइम्सले एलिस हुआङ वा हुआङ ले नामकी चिनियाँ महिलाले एनभिडियाको प्रविधिबारे सूचना प्राप्त गर्ने उद्देश्यले जेनसेनसँग निकट सम्बन्ध बनाउन खोजेको समाचार प्रकाशित गरेको थियो । उनी चिनियाँ गुप्तचर निकायका लागि काम गरेको आशंका गरिएको छ । तर, वासिङ्टनस्थित चिनियाँ दूतावासले जासुसीको आरोप अस्वीकार गरेको छ ।

न्युयोर्क टाइम्सका अनुसार एलिस कार्यरत मेगास्पिड एनभिडियाको ठूलो खरिदकर्ता हो । उक्त कम्पनीले एनभिडियाबाट करिब ४ अर्ब ८० करोड डलरका उपकरण खरिद गरेको थियो । एलिससँग पारिवारिक सम्बन्ध नरहेको जेनसेनले स्पष्ट पारेका छन् ।

विवाद सार्वजनिक भएपछि अमेरिकी संसद्‌मा दुवै दलका सांसदले एनभिडियाको चीनसँगको कारोबार र राष्ट्रिय सुरक्षामा पर्न सक्ने असरबारे प्रश्न उठाएका छन् । डेमोक्र्याटिक सिनेटर एलिजाबेथ वारेनले एनभिडिया र उसका सीईओले संसद्‌लाई जवाफ दिनुपर्ने बताएकी छन् । रिपब्लिकन सांसदहरूले पनि नोभेम्बर १८ मा संसद्‌मा उपस्थित भएर बयान दिन हुआङलाई आग्रह गरेका छन् ।

यसैबीच, हुआङले आइतबार कर्मचारीलाई पठाएको इमेलमा पत्नीप्रति बेइमानी गरेको स्वीकार गरेका छन् । उनले आफ्नो सम्बन्धका कारण पत्नी र सन्तानलाई चोट पुगेको भन्दै त्यसको कुनै बहाना नरहेको बताएका छन् ।

चीन र अमेरिकाबीच कृत्रिम बौद्धिकता (एआई) लगायतका प्रविधिमा प्रभुत्व जमाउने प्रतिस्पर्धा चलिरहेका बेला यो विवाद सार्वजनिक भएको हो । एआई प्रविधिको विस्तारसँगै एनभिडियाका चिपको माग बढेको छ । ओपनएआई, एन्थ्रोपिक, मेटा र गुगलजस्ता कम्पनीले विकास गरेका ठूला भाषा मोडलका लागि एनभिडियाले चिप उत्पादन गर्दै आएको छ ।

अमेरिकाले चीनको प्रविधि र सैन्य क्षमता विस्तार हुन सक्ने आशंकामा उन्नत चिप निर्यातमा प्रतिबन्ध लगाउँदै आएको छ । सन् २०२५ मा दोस्रोपटक राष्ट्रपति बनेका डोनाल्ड ट्रम्पसँग पनि हुआङले निकट रहेर काम गर्दै आएका छन् ।