खाद्यको मेलामा अर्गानिक उत्पादन खोज्दै उपभोक्ता

मेलामा नेपाली उत्पादन, परम्परागत खाद्य सामग्री, फूलमाला, माटाका भाँडा, रैथाने बाली र अल्लोका सामग्रीसहित २६ स्टल राखिएका छन्।

काठमाडौँ — अनलाइनमा गाँजाको मोजा (हेम्स मोजा) को विज्ञापन देखिरहन्थे प्रक्षेप थापा । नगनाउने, बलियो र टिकाउयुक्त मोजाको विज्ञापनले सधैं उनको ध्यान तानिरहन्थ्यो । अनलाइन, सामाजिक सञ्जालमा देखे पनि उनले मोजा लगाएका भने थिएनन् ।

नेपाल टेलिकमका सहायक प्रवक्ता रहेका थापाले शनिबार थापाथलीस्थित खाद्य व्यवस्था तथा व्यापार कम्पनी लिमिटेडले सञ्चालन गरेको तिहार विशेष रैथाने मेलामा हेम्स मोजा दुई जोर किने । ‘यो खुब विज्ञापनमा देखिरहन्थें, गन्हाउँदैन टिक्छ भन्ने सुनेको थिएँ । लगाउन मन थियो,’ थापाले भने, ‘आफ्नै देशको उत्पादन हो, आज किन्न पाएँ ।’

खाद्य व्यवस्था कम्पनीले नेपाली मौलिक संस्कृति, रैथाने उत्पादन, स्थानीय उद्यमशीलता तथा स्वदेशी उत्पादनको प्रवर्द्धन गर्ने उद्देश्यले शनिबारदेखि सोमबारसम्म ‘तिहार विशेष रैथाने मेला २०८३’ सञ्चालन गरेको छ । मेलामा तिहार विशेष परिकार तथा परम्परागत खाद्य सामग्री, फूलमाला तथा सजावटका सामग्री, माटाका भाँडा, रैथाने बालीलगायतका २६ स्टल छन् ।

मेलामा कोठी हिमाल अल्लो कपडा उद्योगले मोजालगायत, झोला स्टकोट बिक्री गरिरहेको छ । यी सामग्रीको मूल्य ३ सय ५० देखि १५ सय ५० सम्म रहेको उद्योगको भनाइ छ । थापा जस्तै उपभोक्ता मोजा, झोलादेखि इस्टकोट किन्न हौसिरहेका थिए । मेलामा विशेष छुटका साथ सामान बिक्री भइरहेको उद्योगका प्रतिनिधि मगर एमले जनाए । ‘हामीले अहिले सामानमा छुट दिइरहेका छौं । टोपी तथा ब्यागको मूल्य ३ सय ५० रुपैयाँदेखि १ हजार ५ सय ५० रुपैयाँसम्म छ,’ मगरले भने, ‘अहिले हामीले केही सामानमा २ सय रुपैयाँसम्म छुट दिएका छौं ।’

उपभोक्ता भने अर्गानिक र रैथाने सामग्री खोज्दै मेला नियालिरहेका छन् । मेलामा पुगेका उपभोक्ता प्रकाशमान श्रेष्ठले पनि मुस्ताङको उत्पादित भन्दै कालो र सेतो सिमी किने । केही वर्षअगाडि जोमसोम जाँदा मुस्ताङको सिमीको स्वाद मिठो लागेकाले किनेको उनले सुनाए । मेलामा रैथाने र अर्गार्निक खाद्यान्न एकै स्थानमा सस्तो मूल्यमा पाएको उनको भनाइ छ । तीन सय ५० प्रतिकेजीमा सिमी किनेका उनले बाहिरभन्दा सस्तो पाएको जनाए ।

भर्टेक्स फुड्स एन्ड बेभरेजेजले विभिन्न प्रकारका तयारी खाद्य सामग्री बिक्रीका लागि राखेको छ । कम्पनीले बालबालिका तथा वयस्कलाई लक्षित गरी प्यानकेक, पौष्टिक पेय, जाउलो, खिर र लिटो बनाउन मिल्ने तयारी मिश्रण (प्रिमिक्स) उत्पादन गरेको कम्पनीकी प्रतिनिधि तथा खाद्यविद् रचना पाण्डेले बताइन् ।

कम्पनीले स्थानीय अन्न तथा गेडागुडीको प्रयोग गरी प्यानकेक, पौष्टिक पेय, जाउलो, लिटो र खिर बिक्रीमा राखेको उनको भनाइ छ । ‘कोदो, गहुँ, कालो दाल, बदाम र आलसजस्ता सामग्री प्रयोग गरेर खाद्यान्न बनाइएको छ,’ पाण्डेले भनिन्, ‘यी उत्पादन सहज रूपमा तयार गर्न सकिने र अर्गानिक स्वाद छ ।’

सरकारी निकाय जडिबुटी उत्पादन तथा प्रशोधन केन्द्र र खाद्य कम्पनी लिमिटेडले पनि आफ्नै छुट्टै स्टल राखेका छन् । जडिबुटी उत्पादन तथा प्रशोधन कम्पनी लिमिटेडका उत्पादित सञ्चो, हिमालयन मसाज वेयल, सिलाजित र हिमालयन मसाज आयल बिक्रीका लागि राखिएको छ ।

सिलाजित तेल स्वास्थ्यका लागि उपयोगी हुनाले अवलोकनकर्ताले धेरै खोजेको कर्मचारी प्रेमबहादुर रावलले जानकारी दिए । खाद्य व्यापार कम्पनीले पनि आफ्नै स्टल राखेको छ । यसमा जुम्लाका सिमी, कागुनो, मासदाल, मसुरो दाल छुटमा बिक्री भइरहेका छन् ।

प्रकृति कान्तिपुर मिडिया ग्रुपका आबद्ध दाहाल, अर्थतन्त्रका विविध आयाम, महिला अधिकार र प्रशासनका विषयमा रिपोर्टिङ गर्छिन् ।