विद्युतको तार सर्ट भएर सुरु भएको आगो ६ वटा दमकल, नेपाली सेना, प्रहरी, सशस्त्र प्रहरी र स्थानीयवासीको प्रयासपछि साढे दुई घण्टामा नियन्त्रणमा आयो।
नेपालगन्ज — बाँकेमा आइतबार साँझ लक्ष्मीपूजाका बेला दुई वटा पसलमा लागेको आगो ६ दमकल प्रयोग गरी दुई घण्टा लगाएर नियन्त्रणमा लिइएको छ ।
जानकी गाउँपालिका–३ कोरियनपुरस्थित लक्ष्मी बिजुली भण्डार एण्ड जनरल अर्डर सप्लायर्स र जय हनुमान ट्रेडर्स एण्ड सप्लायर्समा आगलागी भएको हो । आगलागीबाट करोडौंको क्षति भएको अनुमान गरिएको छ ।
आइतबार बेलुकी करिब ७ बजेको समयमा अमर ओलीले संचालन गर्ने एकै स्थानमा रहेका ती फर्महरुमा विद्युतको तार सर्ट भई आगलागी सुरु भएको हो । विजुलीका सामानको गोदाम भएका आगलागीमा बढी क्षति भएको हो।
करिब साढे २ घन्टापछि साढे ९ बजेतिर आगो नियन्त्रणमा आएको बाँके प्रहरी प्रवक्ता डीएसपी प्रतितसिंह राठौरले बताए । आगो नियन्त्रणमा लिन नेपाली सैनिक, नेपाल प्रहरी, सशस्त्र प्रहरी र स्थानीयवासी खटिएका थिए ।
नेपालगन्ज उपमहानगरपालिकाका ३, कोहलपुर नगरपालिकाको १, नरैनापुर गाउँपालिकाको १ र नेपाल आयल निगम राझाको १ गरी ६ वटा दमकलबाट आगो नियन्त्रणमा लिइएको डीएसपी राठौरले बताए ।
रुपा गहतराज कान्तिपुरकी बाँके संवाददाता हुन् ।
