कालीकोटबाट बिरामी र कुरुवा बोकेर सुर्खेत जाँदै गरेको जिप सोमबार बिहान गुराँस–१ काफलतोलीमा दुर्घटना भएको हो।
कालीकोट — कालीकोटबाट बिरामी बोकेर सुर्खेत जाँदै गरेको बोलेरो जिप सोमबार बिहान ८ बजे दैलेखको गुराँस गाउँपालिका–१ काफलतोलीमा दुर्घटना हुँदा ६ जना घाइते भएका छन्।
सान्नीत्रिवेणी–६ मेहेलमुडीकी २७ वर्षीया बिरामी कैली सार्की र २७ वर्षीया जादुकला सार्कीसहित कुरुवा बोकेर गएको कर्णाली प्रदेश ०२–००१ च १२१५ नम्बरको बोलेरो अनियन्त्रित भएर दुर्घटना भएको प्रहरी चौकी तल्लो डुंगेश्वरका प्रहरी सहायक निरीक्षक ललित रावलले बताए।
उनका अनुसार दुर्घटनामा चालक कालीकोटको सान्नीत्रिवेणी–७ का २२ वर्षीय योगेश सिम्खाडा गम्भीर घाइते भएका छन्। त्यस्तै बिरामी कैली र जादुकलासहित उनीहरूका कुरुवा १८ वर्षीय गंग सार्की, ४१ वर्षीय रने सार्की र सान्नीत्रिवेणी–७ मुम्राका २१ वर्षीय तपेन्द्र सिम्खाडा घाइते भएका छन्।
उनीहरू सबैलाई उपचारका लागि सुर्खेत पठाइएको प्रहरीले जनाएको छ। बिरामी बोकेको बोलेरो राति कालीकोटबाट सुर्खेततर्फ गएको स्थानीय देवीदास बरालले जानकारी दिए।
तुलाराम पाण्डे कान्तिपुरका कालिकोट संवाददाता हुन् ।
