तत्कालीन दुई व्यवस्थापक, एक सेयर सदस्य र दुग्ध व्यापारीबाट रकम नउठ्दा सहकारी घाटामा परे पनि किसानलाई भुक्तानी दिइँदैछ।
धनकुटा — धनकुटा नगरपालिका–३ कागतेस्थित दुग्ध सहकारी संस्थाको १८ लाख ९५ हजार १०० रुपैयाँ बक्यौता रहेको छ। तत्कालीन व्यवस्थापक, सेयर सदस्य र दुग्ध व्यापारीबाट उक्त रकम उठ्न बाँकी रहेको सहकारीका अध्यक्ष मिनबहादुर कार्कीले बताए।
अध्यक्ष कार्कीका अनुसार तत्कालीन व्यवस्थापक दुर्गा थापाबाट १३ लाख १३ हजार ८१२ रुपैयाँ, अर्का व्यवस्थापक उद्धव भण्डारीबाट ८८ हजार ९५३ रुपैयाँ, सेयर सदस्य खिरबहादुर कार्कीबाट ३ लाख ९१ हजार ९३४ रुपैयाँ र दुग्ध व्यापारी टीका कार्कीबाट ६५ हजार रुपैयाँ उठ्न बाँकी छ। उनीहरूले लामो समयदेखि रकम नबुझाएको अध्यक्ष कार्कीले बताए।
पूर्वव्यवस्थापक दुर्गा थापाले २०८१ भदौ १२ मा ६ महिनाभित्र साँवा र ब्याज बुझाउने लिखित सहमति गरेकी थिइन्। तर, सहमतिअनुसार रकम फिर्ता नगरेको अध्यक्ष कार्कीले बताए। अर्का व्यवस्थापक भण्डारीले पनि २०८० जेठदेखि मासिक न्यूनतम ५०० रुपैयाँका दरले रकम बुझाउँदै दुई वर्षभित्र बक्यौता चुक्ता गर्ने लिखित सहमति गरेका थिए। उनले पनि सहमतिअनुसार रकम नबुझाएको अध्यक्ष कार्कीको भनाइ छ।
सेयर सदस्य खिरबहादुर कार्की सम्पर्कमा नरहे पनि उनकी श्रीमतीले सहकारीलाई दूध उपलब्ध गराएर केही रकम भुक्तानी गरिरहेको अध्यक्ष कार्कीले बताए।
अन्य व्यक्तिबाट बक्यौता असुलीका लागि प्रयास भइरहेको संस्थाले जनाएको छ। सहकारीका सल्लाहकार समिति सदस्य लक्ष्मण घिमिरेका अनुसार बक्यौता घटाउने प्रतिबद्धता जनाए पनि सम्बन्धित व्यक्तिहरूले रकम बुझाएका छैनन्। 'तिर्दैनौँ भनेका छैनन्, तिर्छु भन्छन् तर तिर्दैनन्,' उनले भने। २०५० सालदेखि सञ्चालनमा आएको सहकारीले स्थानीय किसानबाट दूध खरिद गरी धनकुटा बजार र दुग्ध विकास संस्थान (डीडीसी) लाई बिक्री गर्दै आएको छ। बक्यौता रकम नउठ्दा संस्था घाटामा परेको भए पनि किसानलाई दूधको भुक्तानी भने दिँदै आएको व्यवस्थापक गणेश न्यौपानेले बताए।
विनोद घिमिरे कान्तिपुर संवाददाता हुन्।
