सिटीको स्वप्निल सुरुआत दुःखद सपनामा परिणत हुँदै

सिटीलाई अहिलेसम्मकै एक खराब नतिजा स्विकार्न बाध्य पार्ने टिम थियो, नटिंघम फरेस्ट । यसपल्ट मारेस्कोको टिमको एक अर्को हारको कारण थियो, डिफेन्सको असाध्यै खराब प्रदर्शन ।

म्यानचेस्टर — जति बेला म्यानचेस्टर सिटीले इंग्लिस प्रिमियर लिगमा आइतबार लगातार तेस्रो हार बेहोर्‍यो, सिटी ग्राउन्डमा गाइएको एक गीत पक्कै प्रशिक्षक एन्जो मारेस्कोले सुनेको हुनुपर्छ । त्यस गीतको आशय थियो, ‘के हामी प्रत्येक साता तिम्रा निम्ति भगवान्‌सँग प्रार्थना गरिरहने ?’

सिटीलाई अहिलेसम्मकै एक खराब नतिजा स्विकार्न बाध्य पार्ने टिम थियो, नटिंघम फरेस्ट । यसपल्ट मारेस्कोको टिमको एक अर्को हारको कारण थियो, डिफेन्सको असाध्यै खराब प्रदर्शन । सिटीले आफ्नै भूलमा के पहिलो गोलको अवसर फरेस्टलाई सुम्पेको थियो, त्यसपछि सिटीले खेलमाथि आफ्नो नियन्त्रण गुमाउँदै गयो ।

जायर कुन्हाको यो गोल जोस्को ग्वार्डिओलको अस्वीकार्य भूलमा सम्भव भएको थियो । सिटीको हारको ठीक अगाडि आर्सनलले हल सिटीलाई पराजित गरेको थियो । आर्सनलको त्यो १–० जितमा जहाँ एक अर्को ‘क्लिन सिट’ सम्भव भयो, त्यही सिटीको डिफेन्सलाई लिएर धेरै प्रश्न उठेको छ । अन्तर्राष्ट्रिय विश्राममा जान अगाडि सिटीले यो समस्याको समाधान खोज्नै पर्ने हुन्छ, अन्यथा अहिले नै आर्सनलसँगको दूरीले ६ अंक छोइसकेको छ, फेरि यो काट्न सजिलो अग्रता पनि होइन । सिटीको अहिलेको प्रदर्शनमा मारेस्को आफैं दुःखी त छन् तर निराश भने छैनन् ।

भलै सिटीको स्वपनिल सुरुआत अहिले दुःखद सपनामा परिणत हुँदै छ । मारेस्को भन्छन्, ‘पहिलो हाफमा फरेस्ट जसरी आक्रामक भएर प्रस्तुत भएको थियो, त्यो हामीले रोक्नै सकेनौं । जति बेला हामी दुई गोलले पछाडि परेका थियौं, त्यति बेला खेलमा फर्कने सम्भावना कमजोर भइसकेको थियो । तर अहिले नै तनाव लिनुपर्ने छैन । टिममा अहिले केही न केही समस्या पक्कै छ तर पनि म फेरि भन्छु, असाध्यै तनाव लिनुपर्ने केही पनि छैन ।’

यस्तोमा एउटा प्रश्न सिटी जसरी आक्रामक भएर प्रस्तुत हुने गर्थ्यो, त्यो एकाएक किन र कता हरायो त ? यसको ठ्याक्कै उत्तर भने मारेस्कोसँग पनि छैन र उनी भन्छन्, ‘यो प्रश्नको उत्तरका लागि मलाई अध्ययन गर्नुछ ।’ कतै यो आर्थिक चलखेलको आरोप पुष्टि भएपछि त्यसकै दबाबमा सिटीले कमजोर प्रदर्शन गर्न थालेको त होइन । वित्तीय अनियमितताका कारण सिटीमाथि जस्तोसुकै ठूलो कारबाही हुने सम्भावना कायमै छ ।

यो कतिसम्म गम्भीर हुन सक्छ, यो अकल्पनीय छ । यस्तोमा यसको सिधा–सिधा प्रभाव टिमको प्रदर्शनमा पनि परेको हुन सक्छ । सिटीले सिजनको सुरुआती सात खेल जितेर सानदार सुरुआत लिएको थियो । त्यसपछि यही सिटी एस्टन भिल्ला र ब्राइटनविरुद्धको खेलमा पराजित रह्यो, अहिले फरेस्टविरुद्ध । सन् २०२४ यता सिटी लगातार तीन खेलमा पराजित रहेको यो नै पहिलो पटक हो ।

यसले केही हदसम्म मारेस्कोको व्यवस्थापकीय क्षमतामा पनि प्रश्न उठेको छ । यी प्रशिक्षक चेल्सीमा छँदा पनि टिमको प्रदर्शन एकनासे थिएन । त्यति बेला चेल्सीले ठूलै टिमलाई सजिलै हराउने गर्थ्यो भने कहिलेकाहीँ आफैं कमजोर प्रतिद्वन्द्वीसँग नराम्रो ढंगले हार्थ्यो । यस्ता प्रश्न अब पनि उठ्यो भने यी प्रशिक्षक पक्कै पनि दबाबमा हुनेछन्, जति बेला पृष्ठभूमिमा पेप ग्वार्डिओलाको समयलाई तुलना गर्ने गरिन्छ ।