परम्परागत शैलीमा निर्माण भइरहेको माङहिममा झिँगटीको छाना, काठका खम्बा र माटोले लिपिएको संरचना तयार पारिनेछ ।
धनकुटा — धनकुटास्थित प्रसिद्ध धार्मिक तथा सांस्कृतिक स्थल खुवालुङ क्षेत्रको प्रवर्धनका लागि साढे २ करोड रुपैयाँ लागतमा पूर्वाधार निर्माण सुरु गरिएको छ ।
सहिदभूमि गाउँपालिका–१ स्थित खुवालुङ क्षेत्रको त्रिवेणीमा गुरुयोजनाअनुसार पहिलो चरणमा कल्चरल माङहिम निर्माण भइरहेको छ । किरात राई यायोक्खासँगको समन्वयमा करिब २५ रोपनी क्षेत्रफलमा विभिन्न संरचना निर्माण गर्ने योजना रहेको पूर्वाधार विकास कार्यालय धनकुटाका निमित्त प्रमुख उत्तम नारायण खरेलले जानकारी दिए ।
उनका अनुसार परम्परागत शैलीमा निर्माण भइरहेको माङहिममा झिँगटीको छाना, काठका खम्बा र माटोले लिपिएको संरचना तयार पारिनेछ । २०८२ चैत १७ गते सम्झौता भएको निर्माण कार्य २०८४ असोज १६ गतेसम्म सम्पन्न गर्नुपर्नेछ ।
कोशी प्रदेश सरकारको भौतिक पूर्वाधार विकास मन्त्रालयअन्तर्गत पूर्वाधार विकास निर्देशनालय र पूर्वाधार विकास कार्यालय धनकुटामार्फत आयोजना कार्यान्वयन भइरहेको हो । टीएम–साइमन जेभीसँग भ्याट र पीएससहित २ करोड ४५ लाख १७ हजार ६ सय ५७ रुपैयाँ १७ पैसामा निर्माण सम्झौता भएको छ ।
खुवालुङ किरात राई, लिम्बू, याक्खा र सुनुवारलगायत समुदायको साझा सांस्कृतिक सम्पदाका रूपमा परिचित छ । किरात भाषामा ‘खुवा’ को अर्थ पानी र ‘लुङ’ को अर्थ ढुंगा हो । सप्तकोशी नदीको बीचमा रहेको विशाल ढुंगालाई खुवालुङ भनिन्छ । यसलाई किरात समुदायको इतिहास, मुन्धुमी ज्ञान, परम्परा र सभ्यतासँग जोडेर हेरिन्छ ।
२०७७ सालमा सप्तकोशीमा जलयातायात सञ्चालनका लागि खुवालुङ ढुंगा फुटाउने विषय सार्वजनिक भएपछि यसको संरक्षणको माग गर्दै व्यापक विरोध भएको थियो । त्यसपछि खुवालुङलाई धार्मिक तथा सांस्कृतिक सम्पदाका रूपमा संरक्षण गर्दै पर्यटकीय गन्तव्यका रूपमा विकास गर्नुपर्ने आवाज उठ्दै आएको छ ।
गुरुयोजनाअनुसार निर्माण हुने संरचनाले खुवालुङको ऐतिहासिक तथा सांस्कृतिक महत्त्व उजागर गर्नुका साथै धार्मिक गतिविधि सञ्चालन र पर्यटकीय आकर्षण बढाउन सहयोग पुग्ने अपेक्षा गरिएको छ ।
विनोद घिमिरे कान्तिपुर संवाददाता हुन्।
