जिल्ला सुरक्षा समितिको निर्णयअनुसार कात्तिक २२ गते बिहानदेखि २६ गते रातिसम्म मुख्य तथा सहायक सडकमा टिपर चलाउन प्रतिबन्ध लगाइएको हो।
काभ्रे — तिहारलक्षित गर्दै काभ्रेपलाञ्चोक जिल्लाभित्र ५ दिन टिपर सञ्चालनमा रोक लगाइएको छ ।
जिल्ला सुरक्षा समितिको निर्णयअनुसार कात्तिक २२ गते बिहान ५ बजेदेखि कात्तिक २६ गते राति ९ बजेसम्म जिल्लाका मुख्य तथा सहायक सडकमा टिपर सञ्चालन गर्न रोक लगाइएको हो ।
जिल्ला प्रशासन कार्यालय काभ्रेपलाञ्चोकले शुक्रबार जारी गरेको सूचनाअनुसार तिहारका बेला सडकमा हुने सवारी चाप तथा सम्भावित दुर्घटनाको जोखिम न्यूनीकरण गर्न यस्तो निर्णय गरिएको प्रमुख जिल्ला अधिकारी गोपालकुमार अधिकारीले जानकारी दिए ।
उनका अनुसार विशेषगरी बीपी राजमार्ग, अरनिको राजमार्गलगायत जिल्लाका सडकमा सवारी आवागमन सहज बनाउन र यात्रुको सुरक्षालाई ध्यानमा राख्दै टिपर सञ्चालनमा रोक लगाइएको हो ।
जिल्ला सुरक्षा समितिको कात्तिक १९ गते बसेको बैठकले गरेको निर्णयअनुसार उक्त अवधिभर टिपर सञ्चालन नगर्न जिल्ला प्रशासन कार्यालयले अनुरोध गरेको हो ।
ज्योती श्रेष्ठ कान्तिपुरकी काभ्रेपलाञ्चोक संवाददाता हुन् ।
