कार्यालयमा सुनका सामग्री थपेपछि ट्रम्पले यसको ऐतिहासिक पहिचान जोगाउने नाममा आगामी राष्ट्रपतिहरूले ठूलो परिवर्तन गर्न नपाउने व्यवस्था गरेका छन्।
काठमाडौँ — अमेरिकी राष्ट्रपति डोनाल्ड ट्रम्पले ह्वाइट हाउसको ओभल अफिसमा भविष्यका राष्ट्रपतिहरूले निश्चित परिवर्तन गर्न नपाउने व्यवस्था गर्ने कार्यकारी आदेशमा हस्ताक्षर गरेका छन् ।
ट्रम्पले आफ्नो दोस्रो कार्यकालमा राष्ट्रपतिको आधिकारिक कार्यकक्ष ओभल अफिसमा विभिन्न परिवर्तन गरेका छन् । बीबीसी का अनुसार तीमध्ये सबैभन्दा उल्लेखनीय कार्यालयका भित्ताहरूमा सुनका सामग्री थप्नु हो ।
'हामी यसलाई राष्ट्रिय स्मारक घोषणा गर्दैछौँ । अब कसैले पनि यसलाई छुन, भत्काउन वा ध्वस्त पार्न पाउने छैन । अलिकति फरक आकारको केही बनाउन मूर्खहरूले यसलाई भत्काउन पाउने छैनन्,' ट्रम्पले बिहीबार पत्रकारहरूसँग भने ।
अमेरिकी राष्ट्रपतिहरूलाई हाल ह्वाइट हाउसमा केही परिवर्तन गर्ने अधिकार छ । तर, ठूला परियोजनाका लागि भने अमेरिकी संसद् (कंग्रेस) को अनुमति आवश्यक पर्छ ।
बिहीबार जारी कार्यकारी आदेशले ओभल अफिस र त्यससँग जोडिएका केही कोठालाई राष्ट्रिय स्मारक घोषणा गरेको छ ।
यद्यपि, उक्त आदेशमा राष्ट्रपतिले स्मारकको सजावट परिवर्तन गर्न, फर्निचर छनोट गर्न वा स्मारकको ऐतिहासिक संरचना तथा वास्तुकलाको स्वरूपमा ठूलो असर नपर्ने गरी नियमित सञ्चालन र सुरक्षासम्बन्धी परिवर्तन गर्न पाउने अधिकारमा कुनै प्रतिबन्ध नलगाइएको उल्लेख छ ।
'हामीलाई ओभल अफिस मन पर्छ । यो आफैँमा ह्वाइट हाउसजस्तै एउटा प्रतीक हो । यो हाम्रो देश र देशको महानताको प्रतीक हो,' ट्रम्पले भने ।
राष्ट्रपतिलाई राष्ट्रिय स्मारक घोषणा गर्ने अधिकार छ । यस्ता स्मारक राष्ट्रिय निकुञ्जसरह मानिन्छन् ।
ट्रम्पको आदेशमा ओभल अफिसको ऐतिहासिक स्वरूप, वास्तुकलाको मौलिकता र राष्ट्रपतिको कार्यालयका रूपमा रहेको यसको ऐतिहासिक सम्बन्ध जोगाउने गरी राष्ट्रिय निकुञ्ज सेवाले यसको संरक्षण गर्नुपर्ने उल्लेख छ ।
ह्वाइट हाउसको सम्पूर्ण भवन यसअघि नै राष्ट्रिय ऐतिहासिक सम्पदाका रूपमा सूचीकृत छ । यस्तो सूचीकरणको उद्देश्य भवनमा अचानक हुने परिवर्तन रोक्नु हो ।
ट्रम्पको घोषणापत्रमा विद्यमान संरक्षण व्यवस्थालाई स्वीकार गरिएको छ । तर, 'ओभल अफिस आफैँमा राष्ट्रिय महत्त्वको छुट्टै ऐतिहासिक संरचना भएकाले यसको विशिष्ट पहिचान र संरक्षण व्यवस्थापन आवश्यक छ' भनिएको छ ।
राष्ट्रिय ऐतिहासिक सम्पदा संरक्षण ऐनमा कंग्रेसले राष्ट्रपतिलाई आवश्यक परिवर्तन गर्न दिने गरी छुट्टै व्यवस्था गरेको छ । हालको ओभल अफिस सन् १९३० को दशकको सुरुदेखि अस्तित्वमा छ । तत्कालीन राष्ट्रपति फ्र्यांकलिन डी. रुजवेल्टको अवधारणाअनुसार यसको निर्माण भएको थियो ।
मध्यावधि निर्वाचनको प्रचार अभियानका क्रममा डेमोक्र्याटहरूले ट्रम्पले ओभल अफिसमा गरेका परिवर्तनको आलोचना गरेका थिए । पूर्वराष्ट्रपति बाराक ओबामाले त सुनका सजावट थपेपछि ह्वाइट हाउस 'सद्दाम हुसेनले चिजकेक फ्याक्ट्री खोलेको जस्तो देखिएको' टिप्पणी गरेका थिए ।
