एक सहमहामन्त्रीका अनुसार बैठकमा सभापति गगन थापालाई पक्राउ गर्ने हल्ला, पार्टी नेतृत्वविरुद्ध सार्वजनिक भएका आरोप र सरकारका पछिल्ला गतिविधिबारे छलफल हुनेछ ।
काठमाडौँ — कांग्रेस पदाधिकारीको अनौपचारिक बैठक आज अपराह्न ३ बजे सानेपामा बस्ने भएको छ । यो बैठकअघि वरिष्ठ उपसभापति विश्वप्रकाश शर्मा नेतृत्वमा रहेको पार्टीको नीति प्रतिष्ठानको बैठकसमेत बसेको थियो ।
एक सहमहामन्त्रीका अनुसार बैठकमा सभापति गगन थापालाई पक्राउ गर्ने हल्ला, पार्टी नेतृत्वविरुद्ध सार्वजनिक भएका आरोप र सरकारले लिइरहेको ‘निरंकुश’ बाटोका विषयमा छलफल हुनेछ ।
बुधबार पनि सानेपामा पदाधिकारीको यस्तै अनौपचारिक बैठक बसेको थियो । बैठकपछि वरिष्ठ उपसभापति विश्वप्रकाश शर्माले सरकारका पछिल्ला गतिविधिका बारेमा कांग्रेसको धारणा राखेका थिए । उनले सरकारले प्रेस स्वतन्त्रता खुम्च्याउने र कर्मचारी तथा सुरक्षा संयन्त्रमा भय फैलाउने काम गरिरहेको बताएका थिए ।
कुलचन्द्र कान्तिपुर मिडिया ग्रुपका राजनीतिक संवाददाता हुन् । उनी राजनीतिक दल, संसदीय मामिलासँग सम्बन्धित बिषयमा रिपोर्टिङ/टिप्पणी लेख्छन् ।
