प्लेअफ समीकरणका लागि आधार तयार हुने हुनाले नेपाल प्रिमियर लिग (एनपीएल) मा अबका खेलहरू अझ बढी रोमाञ्चक र प्रतिस्पर्धात्मक हुनेछन्
काठमाडौँ — नेपाल प्रिमियर लिग (एनपीएल) को तेस्रो सिजनले दोस्रो विश्राम लिएयता बिहीबारदेखि फेरि खेल सुरु हुनेछ । प्लेअफ समीकरणका लागि आधार तयार हुने हुनाले अबका खेलहरू अझ बढी रोमाञ्चक र प्रतिस्पर्धात्मक हुनेछन् । अबका चार खेलले ठ्याक्कै प्लेअफ पुग्ने कुनै टिमको स्पष्ट निर्णय नगरे पनि एउटा सम्भावना भने छ, प्लेअफ नपुग्ने एउटा टिमको किटान हुन सक्नेछ ।
यस्तोमा तेस्रो सिजनको एनपीएल सनसनीको उत्कर्षतर्फ अग्रसर छ । बिहीबार डबल हेडरमा लुम्बिनी लायन्सले जनकपुर बोल्ट्स र काठमान्डु गोर्खाजले विराटनगर किंग्सको सामना गर्नेछन् । शुक्रबारका दुई खेलमा सुदूरपश्चिम रोयल्स र कर्णाली याक्स तथा चितवन राइनोज र पोखरा एभेन्जर्स भिड्ने छन् । तेस्रो विश्राममा जानु अगाडि शनिबार काठमान्डु र लुम्बिनीले एकअर्काविरुद्ध खेल्नेछन् । राउन्ड रोबिन लिगको १३ खेल समाप्तिमा डिफेन्डिङ च्याम्पियन लुम्बिनी ५ अंकसहित शीर्षस्थानमा छ । त्यसपछि चार टिम ४ अंकमा छन् । यी टोलीहरू नेट रनरेटले मात्र छुट्टिएका छन् । दोस्रोदेखि पाँचौं स्थानसम्म रहनेमा विराटनगर, कर्णाली, जनकपुर र सुदूरपश्चिम छन् । त्यसपछि चितवनको ३ र काठमान्डुको २ अंक छ । तीन खेल खेलेको पोखरा अंकविहीन भएर पुछारमा छ ।
लुम्बिनी–जनकपुर यो एक खास अर्थमा ‘ब्लकबस्टर्स’ खेल रहनेछ, किनभने यो पछिल्ला दुई सिजनका विजेताबीचको खेल हुनेछ । लुम्बिनी त वर्तमान च्याम्पियन नै भयो, जनकपुरले पहिलो सिजन उपाधि जितेको थियो । अहिले कुनै एक खास टिम लयमा छ भने त्यो लुम्बिनी नै हो । रोहित पौडेलको नेतृत्वमा पछिल्ला ९ खेलमा हार सामना गर्नुपरेको छैन । यसमा पोहोर सिजनका तीन प्लेअफ खेल पनि पर्दछ ।
चितवनविरुद्धको एउटा खेल वर्षाका कारण रद्द हुनुबाहेक टिमका लागि अरू सबथोक राम्रो चलिरहेको छ । कप्तान रोहित भन्छन्, ‘यो नहार्ने क्रम चलिरहोस् ।’ लुम्बिनी अबको खेल जितेमा प्लेअफको असाध्यै नजिक पुग्नेछ, किनभने पछिल्ला दुवै सिजन ८ अंक लिग चरण काट्न चाहिने कम्तीको मापदण्ड बनेको छ ।
जनकपुरको प्रदर्शन अहिले ठीकठाक चलिरहेको छ । पहिलो खेल गुमाएर त्यसयता दुई जित निकालेको जनकपुरले विरानगरविरुद्धको खेल २ रनको झिनो अन्तरले मात्र गुमाएको थियो । कप्तान हरमित सिंहले पनि मानेका छन्, त्यस खेलको अन्तिम बलमा जित निकालेको भए, प्लेअफ समीकरण असाध्यै सजिलो हुन्थ्यो । यी दुई टिम एक आपसमा दुईपल्ट मात्र भिडेका छन् । यसमा एक जित जनकपुरको छ भने अर्को जित लुम्बिनीको ।
काठमान्डु–विराटनगर दुवै टिम आ–आफ्नो पछिल्लो खेलमा प्राप्त सनसनीपूर्ण जितले खुसी छन् । विराटनगरले त्यही जनकपुरविरुद्धको खेल अन्तिम बलमा जितेको थियो । एन्ड्रे रसेलले बल र ब्याट दुवैबाट राम्रो गरिरहेका छन् । उनी नै अबको खेलमा निर्णायक हुन सक्नेछन् । विराटनगरसँग जोडिएयता उनी लगातार दुई खेलमा ‘प्लेयर अफ द म्याच’ भइसकेका छन् । उनले के दाबी गरेका छन् भने आफ्नो नेपाल बसाइ केही लामो हुन सक्नेछ ।
त्यसको अर्थ, विराटनगरले लिग चरण काट्छ भन्ने नै हो । सुरुआती २ खेलमा जितको संघारमा रहेर पनि विराटनगर दुवैमा पराजित रह्यो । कप्तान सन्दीप लामिछाने रसेलको प्रशंसा गर्दा खुसी देखिएका छन् । सुदूरपश्चिमविरुद्ध प्राप्त भाग्यमानी जितले विराटनगर फेरि प्लेअफ समीकरणमा फर्केको हो । काठमान्डुका लागि जनकपुरविरुद्धको खेल त बिर्सनलायक नै रह्यो । त्यसमा खेलाडीहरू जित्नकै लागि खेलिएको पनि देखिएन । तर कर्णालीविरुद्ध भने काठमान्डुको जित अहिलेसम्मकै उत्कृष्टमध्ये एक रह्यो । काठमान्डुको त्यो ४ विकेटको जित १ सय ८१ रनको लक्ष्य पछ्याएर प्राप्त भएको हो । काठमान्डुका कप्तान करण केसी आफ्नो टिममाथि पूरा विश्वास रहेको बताउँछन्् । यी दुई टिम अहिलेसम्म दुईपल्ट भिडेकामा नतिजा दुवैको पक्षमा १–१ रहेको छ ।
विराटनगरविरुद्धको खेल सुदूरपश्चिमले जसरी गुमाएको छ, त्यसमा टिमलाई धेरै गुनासो रहेको देखिएको छ । प्रशिक्षक मिसबाह उल–हकले असन्तोष व्यक्त गरेका छन् । तर तिनै मिसबाह चितवनविरुद्धको खेलपछि भने केही खुसी देखिए । खेलको अन्त्यतिर उनको अनुहारमा हाँसो देखिएको थियो । तर आफ्नो पछिल्ला दुवै खेलपछि सुदूरपश्चिमले पोस्टम्याच समारोहमा सहभागिता जनाएको छैन । सायद सुदूरपश्चिमको चित्त दुखाइ होला । तर टोलीका लागि अब पुरानो कुरा बिर्सेर अगाडि बढ्नु नै ठीक हुनेछ । दीपेन्द्रसिंह ऐरीको नेतृत्वमा सुदूरपश्चिम त्यस्तो टिम हो, जसलाई लिग चरणमा कसरी जित निकाल्नुपर्छ, त्यो थाहा छ । सुरुआती दुई सिजनमा लिग चरणमा एक–एक खेलमा गुमाएको सुदूरपश्चिमले यसपल्ट दुई हार बेहोरिसकेको छ । टोलीका लागि अब तेस्रो हार सह्य हुने छैन ।
सुदूरपश्चिमको प्रतिद्वन्द्वी कर्णालीको प्रदर्शन पनि राम्रै चलिरहेको छ । भलै, टोली काठमान्डुसँग स्तब्धपूर्ण नतिजा बेहोर्न बाध्य रह्यो । नत्र सुरुआती दुई खेल कर्णालीले जसरी जितेको छ, त्यसको प्रशंसा नै गर्नुपर्छ । अब त दक्षिण अफ्रिकी ब्याटर डेविड मिलर नेपाल आइसकेका छन् । उनको आगमनले कर्णाली उत्साहित रहनेछ । तर कर्णालीको पक्षमा एउटा तथ्य भने राम्रो छैन । यी दुई टिमबीचको अघिल्ला संस्करणमा सुदूरपश्चिम नै विजयी छ ।
चितवन–पोखरा पोखरा नै एक्लो त्यस्तो एकमात्र टिम रहेको छ, जसले अहिलेसम्म प्लेअफ खेलेको छैन । टोलीलाई डर छ, तेस्रो सिजन पनि नखेल्ने त होइन । कारण स्पष्ट छ, पोखरा आफ्ना सुरुआती तीनै खेलमा पराजित छ । अझ लुम्बिनीविरुद्धको तेस्रो खेलमा पोखरा जसरी पराजित रह्यो, त्यो स्वीकार्न योग्यसमेत छैन । कप्तान कुशल भुर्तेल मान्छन्, किन टिम लगातार हार्छ भन्नै सकिएको छैन । उनी मान्छन्, अबको खेलमा जित्न सकिएन भने प्लेअफको सम्भावना टुंगिन्छ नै । त्यसैले पोखरा आफ्नो छोटो इतिहासमा आफूलाई प्रमाणित गर्नुपर्ने सबैभन्दा ठूलो र महत्त्वको खेल खेल्दै छ । तर पोखरा आफूले खेलेका सबै १७ खेलमध्ये पाँचपल्ट मात्र विजयी छ । यसले देखाउँछ, पोखरालाई जित्न जहिल्यै गाह्रो हुन्छ । संयोगले पोखराको पछिल्लो जित भनेकै चितवनविरुद्ध नै छ ।
दुई टिमबीचको पहिलो खेल भने चितवनले जितेको थियो । यसपल्ट चितवनको प्रदर्शन मिश्रित छ । टोलीले एक खेल जितेको छ, एक खेल गुमाएको छ अनि वर्षाका कारण एक खेल विना नतिजा टुंग्याएको छ । चितवनले आफूले सक्दो खेलेको छैन अथवा भनौं खेल्न पाएको छैन । चितवनलाई पनि जित अत्यावश्यक छ, टोलीका लागि २ अंक हात पार्न सकिने प्रतिद्वन्द्वी पोखरा हुन सक्नेछ ।
