सन् २०२४ मा मूल्यवृद्धि नियन्त्रण लिने वाचासहित ट्रम्प निर्वाचित भएका थिए । तर विदेशी वस्तुहरूमाथि लगाइएको भारी कर र इरानविरुद्धको युद्धले धेरै अमेरिकीहरूको आर्थिक अवस्थालाई थप नाजुक बनाइदियो
काठमाडौँ — निर्वाचनपूर्वका जनमत सर्वेक्षणहरुले यसपटक डेमोक्रेट्सका लागि अनुकूल परिणाम आउने संकेत गरेका थिए । तर, यति ठूलो संख्यामा मतदाताहरु डेमोक्रेटिक पार्टीका पक्षमा उभिन्छन् भन्ने अनुमान गरिएको थिएन ।
यसपटक डेमोक्रेटिक पार्टीको विजय धेरै अर्थमा महत्वपूर्ण रह्यो । परम्परागत रुपमा रिपब्लिकन पार्टीको किल्ला मानिएका क्षेत्रमा पनि डेमोक्रेट्स विजयी भए ।
टेक्सासमा जेम्स टालारिकोले रिपब्लिकन केन प्याक्सटनलाई पराजित गरे । विगत ३८ वर्षयता यस राज्यमा डेमोक्रेटिक पार्टीका उम्मेदवार सिनेटर चुनिएको यो पहिलोपटक हो ।
दक्षिण क्यारोलिनामा पनि डेमोक्रेटिक पार्टीले सिनेटको सिट खोसेको छ । एक्काइसौं शताब्दीमा डेमोक्रेटिक पार्टीले यस राज्यमा सिनेटको चुनाव जितेको यो पहिलोपटक हो ।
पार्टीले इतिहास रचेको छ । यस शताब्दीमा डेमोक्रेट्सले त्यहाँ अमेरिकी सिनेटको निर्वाचन जितेका थिएनन् ।
ट्रम्पलाई तीनपटक मत खसालेको राज्य ओहायोको सिनेट दौडमा यसपटक डेमोक्रेटिक उम्मेदवार सिरोड ब्राउनले बाजी मारे । क्यान्सासमा डेमोक्रेट एडम हेमिल्टनले रिपब्लिकन उम्मेदवार रोजर मार्सललाई सहजै पराजित गरे। सन् १९३२ यता डेमोक्रेट्सले क्यानसासमा डेमोक्रेटिक उम्मेदवार सिनेटमा विजयी भएको यो पहिलोपटक हो ।
तल्लो सदन प्रतिनिधिसभामा पनि डेमोक्रेटिक पार्टीको बहुमत आउने देखिएको छ । अमेरिकी समाचार एजेन्सी एपीको प्रक्षेपणअनुसार २ सय २५ सिटमा डेमोक्रेटिक पार्टी र १ सय ३७ सिटमा रिपब्लिकन विजयी हुने देखिन्छ । यद्यपि, अन्तिम परिणाम सार्वजनिक हुन बाँकी नै छ ।
डेमोक्रेट्सले केही महिनाअघिसम्म असम्भवजस्तै देखिएका रिपब्लिकन पार्टीका किल्लाहरुमा पनि आफ्ना उम्मेदवार खडा गर्ने रणनीति बनाएका थिए । उनीहरुले बढ्दो मूल्यवृद्धि , आप्रवासनमा गरिएको कडाई र इरान युद्धको विषयलाई चुनावमा जर्बजस्त रुपमा उठाए । जसकारण, मूल्यवृद्धिले आक्रान्त जनताहरु उनीहरका पक्षमा खडा भएको देखियो ।
तर, संसद्का दुबै सदन (सिनेट र प्रतिनिधिसभा) मा प्राप्त बलिया जनमत डेमोक्रेट्सका लागि दबाबपूर्ण पनि हुनेछ । अब उनीहरुले ट्रम्पको विरोध गरेर मात्रै पुग्नेछैन । बरु, जनताका आर्थिक चिन्ताहरुलाई जिम्मेवार ढंगले सम्बोधन गर्न लाग्नुपर्नेछ । किनकि, मतदाताले आगामी दिनमा हुने मूल्यवृद्धि र दैनिक जीवनका समस्यामा डेमोक्रेटिक पार्टीलाई पनि उत्तिकै जिम्मेवार ठान्नेछन् । राष्ट्रपति ट्रम्पसँग भिटो अधिकार कायम रहने हुनाले सदनले पारित गर्न सक्ने कानुनहरूमा हस्ताक्षर गर्न उनले आनेकानी गर्नसक्छन् । ट्रम्पले सञ्चारमाध्यमहरूलाई आफूले निर्वाचनको परिणाम स्वीकार गर्ने र डेमोक्रेट्ससँग सहकार्य गर्न तयार रहेको बताएका छन् ।
ट्रम्पले मतदाताहरूलाई भनेका थिए, ‘म उम्मेदवार छैन । तर, चुनावी मैदानमा छु भन्ने सोचेर रिपब्लिकन पार्टीका उम्मेदावरहरुलाई भोट गर्नुस् ।’ उनी चुनावी अभियानमा निकै सक्रिय देखिएका थिए ।
मतदाताहरुले पनि त्यस्तै गरे, उनीहरुले ट्रम्पका नीतिहरुको भारी बोकाउँदै रिपब्लिकन पार्टीका उम्मेदवारहरुलाई हराइदिए । ट्रम्पका एजेन्डासँग सहमत भएर दुई वर्षअघि उनलाई विजयी गराएका जनताहरु पछिल्लो समय उनको व्यवहारबाट हैरान भएको यसले देखाएको छ ।
एपीसहित प्रमुख अमेरिकी सञ्चारमाध्यमहरुले गरेको सर्वेक्षणअनुसार झण्डै १० मध्ये ९ जनाले आफ्नो मतदानको निर्णयमा जीवनयापनको बढ्दो खर्च निर्णायक कारकको रुपमा रहेको बताएका थिए ।
सन् २०२४ मा मूल्यवृद्धि नियन्त्रण लिने वाचासहित ट्रम्प निर्वाचित भएका थिए । तर विदेशी वस्तुहरूमाथि लगाइएको भारी कर र इरानविरुद्धको युद्धले धेरै अमेरिकीहरूको आर्थिक अवस्थालाई थप नाजुक बनाइदियो । उनको लोकप्रियता घटेर ऐतिहासिक रूपमै तल झर्यो । जसकारण, निर्वाचनमा उनको सक्रियताले उल्टै परिणाम बिगार्नसक्ने भय रिपब्लिकन उम्मेदवारहरुलाई थियो ।
एपीले गरेको सर्वेक्षणका क्रममा झन्डै दुई तिहाइ मतदाताले महँगीका लागि ट्रम्पलाई जिम्मेवार ठहराएका छन् । तीन चौथाइले देशको दिशानिर्देशप्रति आफूहरू क्रुद्ध वा असन्तुष्ट रहेको बताएका छन्। मतदाताहरूले सरकारी भ्रष्टाचारप्रति पनि व्यापक चिन्ता व्यक्त गरेका छन् ।
