जिल्ला प्रहरी कार्यालय डोल्पाबाट खटिएको प्रहरी टोलीले मंगलबार त्रिपुरासुन्दरी नगरपालिका–४ रङ्गबाट उनीहरूलाई पक्राउ गरेको हो।
सुर्खेत — डोल्पा कारागारबाट फरार भएका थप दुई कैदी पक्राउ परेका छन्। जिल्ला प्रहरी कार्यालय डोल्पाबाट खटिएको प्रहरी टोलीले मंगलबार त्रिपुरासुन्दरी नगरपालिका–४ रङ्गबाट उनीहरूलाई पक्राउ गरेको हो।
प्रहरी नायब उपरीक्षक अनिलराज गिरीको कमाण्डमा खटिएको नौ जनाको टोलीले स्थानीय कमला बुढाको घरमा लुकिछिपी बसेको अवस्थामा उनीहरूलाई नियन्त्रणमा लिएको जिल्ला प्रहरी कार्यालय डोल्पाले जनाएको छ।
पक्राउ पर्नेमा जाजरकोटको नलगाड नगरपालिका–९ का १९ वर्षीय कपिल परियार र डोल्पाको त्रिपुरासुन्दरी नगरपालिका–७ का २९ वर्षीय कालीप्रसाद रोकाया छन्। परियार नकबजनी चोरी मुद्दामा तीन वर्ष कैद सजाय तोकिएका व्यक्ति हुन्। उनले दुई वर्ष सात महिना कैद भुक्तान गर्न बाँकी छ। त्यस्तै, रोकाया जबर्जस्ती करणी मुद्दामा आठ वर्ष कैद सजाय तोकिएका व्यक्ति हुन्। उनको पनि दुई वर्ष सात महिना कैद भुक्तान गर्न बाँकी रहेको प्रहरीले जनाएको छ।
प्रदेश प्रहरी कार्यालयका एसएसपी सन्तोषसिंह राठौरले कारागारबाट फरार अन्य चार कैदीको खोजी भइरहेको बताए। उनीहरूको खोजीका लागि प्रहरी परिचालन गरिएको उनको भनाइ छ।
ज्योति कटुवाल कान्तिपुरकी सुर्खेत संवाददाता हुन् ।
