अभिनेता दीपकराज गिरी रसिक मात्र छैनन्, समसामयिक कुरामा कटाक्ष गर्न पनि उत्तिकै माहिर छन् । कुरालाई कसरी घुमाउने, कता तन्काउने अनि कसरी प्रहार गर्ने ? धारिला शब्द प्रयोग गर्न उनी निकै सिपालु छन् ।
हुन त कुरा गर्न मात्र होइन, सिनेमा बनाउन पनि उनी सिपालु छन् । ‘तीतो सत्य’लाई टेलिभिजनबाट इन्ड क्ल्याप गरेर सिनेमा निर्माणमा लागेका उनले जति फिल्म बनाए, ती सबै सुपरहिट भए । एकपछि अर्को हिट फिल्म दिइरहेका उनलाई यसपालि भने ठेस लाग्यो ।
दसैँको पूर्वसन्ध्यामा प्रदर्शनमा आएको उनको चलचित्र ‘छ माया छपक्कै–२’ले अपेक्षित व्यापार गर्न सकेन । करिब दुई साताको व्यापारिक अंकगणितबाट थाहा भयो, यसपालि फिल्मले भाका टिपेन ।
अन्ततः यो कुरा हाँसीहाँसी स्वीकार गरे दीपकराजले । उनले फेसबुकमा लामो स्टाटस लेख्दै फिल्म असफल भएको भन्दै आत्मसमीक्षा गरेका छन् ।
उनले फिल्म असफल भएपछि त्यसको कारण खोज्ने क्रममा अनेक शङ्का–उपशङ्का पैदा हुने बताएका छन् । सुटिङको बेला हिरोइनले हाच्छ्युँ गरेर पो हो कि, हिँड्ने बेला श्रीमतीले रित्तो गाग्री देखाएर पो हो कि ?
यद्यपि, यस्ता शङ्कामा रुमल्लिनुभन्दा आफ्नै कमजोरी खोज्नु उपयुक्त हुने उनको बुझाइ छ । उनले लेखेका छन्, ‘मैले व्यक्तिगत रूपमा भएका कमजोरीहरू महसुस गरिसकेँ । तर, उद्योगका अन्य साथीभाइले पनि केही आत्मसमीक्षा नगरे फिल्मको भविष्य कमजोर हुँदै जाने निश्चित नै छ ।’
उनले यहाँ एउटा पङ्क्ति यस्तो लेखेका छन्, ‘मैले खेलेको खेलको असरले कतै आफैँलाई हानि गर्ने वातावरण त बन्दै छैन ?’ उनको यो कटाक्ष अरूको फिल्म असफल बनाउन खेलिने खेलप्रति लक्षित छ ।
यसपालि चारवटा फिल्म केही दिनको अन्तरमा प्रदर्शनमा आए । ती फिल्महरू एकअर्काका प्रतिस्पर्धी जस्ता पनि देखिए । यस्तो पृष्ठभूमिमा आफ्नो फिल्म सफल वा राम्रो बनाउनेभन्दा पनि अरूको फिल्म नराम्रो बनाउने चलखेल बढी भएको उनको बुझाइ छ ।
