कारोबारमा आएयता पहिलो पटक घट्यो बेनी हाइड्रोको सेयर मूल्य

गत २९ असोजबाट कारोबारमा आएको बेनीको सेयरमा लगानीकर्तालाई ७ गुणाभन्दा बढी नाफा भइसकेको छ ।

काठमाडौं — सेयर कारोबारमा आएयता पहिलो पटक बेनी हाइड्रोपावरको सेयर मूल्य घटेको छ । गत २९ असोजबाट कारोबारमा आएको बेनीको सेयरमा लगानीकर्तालाई ७ गुणाभन्दा बढी नाफा भइसकेको छ ।

यसले अंकित मूल्य एक सय रूपैयाँमा सेयर जारी गरेको थियो । नेपाल स्टक एक्सचेन्जमा २७३ रूपैयाँबाट  पहिलो कारोबार भएको यसमा अहिले लगानीकर्तालाई ७ गुणाभन्दा धेरै फाइदा भएको छ ।

२९ असोजबाट लगातार बढेको मूल्य वृद्धिमा अब भने रोक लाग्ने संकेत देखिएको छ ।

हालै कारोबारमा आएको कारण सेयर आपूर्ति कम हुँदा मूल्य बढिरहेको थियो । एउटा निश्चित मूल्य पुगेपछि अहिले लगानीकर्ताहरू यसको सेयर बिक्री गर्न लागेका छन् । सोमबारबाट यसको सेयर कारोबार पनि बढेको छ । सोमबार यसको ९५ हजार कित्ता सेयर बिक्री भएको छ ।

मंगलबार बजार खुल्दा मूल्य ८०६ रूपैयाँ कायम थियो ।