न्यायालयमा न्याय खोज्ने सर्वसाधारणले नै न्यायाधीशको निष्पक्षतामाथि प्रश्न उठाउनुपर्ने अवस्था आउनु पक्कै सुखद कुरो होइन । सर्वोच्च अदालतका न्यायाधीश हरिप्रसाद फुयाल र बिचौलियाका रूपमा चर्चामा आएका इनम सापकोटाबीचको सम्पर्क तथा भेटघाटको चर्चा अहिले सबैतिर चिन्ता र चासोको विषय बनेको छ । सर्वोच्च अदालतका न्यायाधीश फुयाल र बिचौलियाका रूपमा चर्चामा आएका सापकोटाबीचको सम्पर्क तथा भेटघाटले न्यायालयको निष्पक्षता र विश्वसनीयतामाथि प्रश्न उठाएको छ । विवाद अदालतको आन्तरिक छानबिनदेखि संसदीय कारबाहीको बहससम्म पुग्ने संकेत देखिएपछि अब यस विषयमा निष्पक्ष निरुपण अपरिहार्य भएको छ ।
न्यायाधीश फुयालले सापकोटा प्रधानमन्त्रीको नाम लिएर आफूहरूसमक्ष आएको र कुराकानी भएको स्वीकार गर्दै आफू कुनै प्रभावमा नपरेको स्पष्टीकरण दिनुभएको छ । तर, व्यक्तिगत स्पष्टीकरणले मात्र विवाद टुंगिँदैन । सापकोटा किन न्यायाधीशसमक्ष पुगे, भेटघाटको उद्देश्य के थियो र कुनै मुद्दाको न्यायिक प्रक्रियामा प्रभाव पार्ने प्रयास भएको थियो कि थिएन भन्ने विषय स्वतन्त्र अनुसन्धानबाट स्थापित हुनुपर्छ । सर्वोच्च अदालतको पूर्ण बैठकले पनि सार्वजनिक रूपमा उठेका प्रश्नमाथि निष्पक्ष छानबिन गरी सत्यतथ्य सार्वजनिक गर्न आग्रह गरेको छ । विवादमा न्यायाधीशहरूकै नाम जोडिएको अवस्थामा छानबिनको निष्पक्षता र विश्वसनीयता सुनिश्चित गर्नु झनै आवश्यक छ ।
स्रोतमा पूरा पढ्नुहोस् ( newsofnepal.com )
