लोकतन्त्रमाथि चुनौती थपियो : दाहाल

दाहालले जनतासँगको सम्बन्ध सुधार गरेर कम्युनिष्टहरु जुर्मुराएर अहिलेको व्यवस्थाको संरक्षण गर्ने दाबी गरे ।

सर्लाही — नेपाली कम्युनिष्ट पार्टीका संयोजक एवं पूर्वप्रधानमन्त्री पुष्पकमल दाहालले देश अहिले अप्ठ्यारो परिस्थितिबाट गुज्रिरहेको बताउँदै लोकतन्त्रमाथि चुनौती थपिएको बताएका छन् । पछिल्लो समयका केही गतिविधिले संविधान र लोकतन्त्रको रक्षा नै चुनौतीपूर्ण बनेको उनको भनाइ छ ।

सर्लाही सदरमुकाम मलंगवामा आइतबार पार्टीको एकता बैठक तथा प्रशिक्षण कार्यक्रमलाई सम्बोधन गर्दै दाहालले जनतासँगको सम्बन्ध सुधार गरेर कम्युनिष्टहरु जुर्मुराएर अहिलेको व्यवस्थाको संरक्षण गर्ने दाबी गरे ।

उनले आगामी दिनमा विगतका गल्ती सच्याएर अघि बढ्ने बताए । 'विगतका गल्ती सच्याउँदै जनताका घरदैलो तथा टोल बस्तीमा पुग्दै छौं,' उनले भने, 'जनतासँगको सम्बन्ध सुधार र पार्टीको संगठन मजबुद बनाउने उद्देश्यले पार्टीले राष्ट्रिय जागरण अभियान सुरु गरेको हो ।' सबैभन्दा बढी निर्वाचन क्षेत्र मधेशमा रहेकाले अन्य दलहरु झैं नेकपाको पनि अहिले मधेशमा बढी ध्यान केन्द्रित भइरहेको उनले बताए ।

संयोजक दाहालले राष्ट्रियता र स्वाधिनताको रक्षाका लागि मधेशले फेरि एक पटक अग्रभागमा रहेर साथ दिन आग्रह गरे ।

त्यस्तै पूर्वप्रधानमन्त्री एवं नेकपाका सहसंयोजक माधवकुमार नेपालले ३५ वर्षमा केही भएन भनेर पुराना राजनीतिक दल तथा राजनीतिज्ञलाई नराम्रो देखाउने प्रयास भइरहेको गुनासो गरे । शिक्षा, साक्षरता, हुलाकी राजमार्ग, मध्यपहाडी लोकमार्ग, जिल्ला सदरमुकामलाई जोड्ने सडक निर्माण, विद्युत् परियोजनालगायत क्षेत्रमा ३५ वर्षमै धेरै परिवर्तन आएको नेपालको भनाइ छ । नेता नेपालले सरकारलाई रोजगारी सिर्जना, किसानको समस्या समाधान र उद्योगधन्दा सञ्चालनतर्फ ध्यान केन्द्रित गर्न सुझाव दिए ।

कार्यक्रममा सर्लाहीका विभिन्न राजनीतिक दलबीच एकता भएको घोषणा गरिएको छ । देशभरका अन्य ७६ जिल्लामा यसअघि नै एकता भए पनि सर्लाहीमा भने आइतबार बल्ल एकतासभा गरिएको हो । सहभागी नेता, कार्यकर्तालाई पार्टीका केन्द्रीय संयोजक, सह–संयोजक, प्रदेश इन्चार्जलगायतका नेताले प्रशिक्षणसमेत प्रदान गरेको जिल्ला नेता रामेश्वर रायले जानकारी दिए ।