यी हुन् डोल्पा कारागारबाट सुरुङ खनेर भाग्ने आठ कैदी

शनिबार बिहान कैदी गणनाका क्रममा उनीहरू नपुगेपछि घटना खुलेको हो, प्रहरीले खोजी र प्रशासनले घटनाबारे छानबिन अघि बढाएका छन्।

काठमाडौँ — डोल्पा कारागारबाट शनिबार बिहान सुरुङ खनेर फरार भएका आठ कैदीको पहिचान खुलेको छ। फरार हुनेमा रुकुमपश्चिमका तीन, जाजरकोटका दुई, डोल्पाका दुई र सल्यानका एक जना छन्।

फरार हुनेमा रुकुमपश्चिमको आठविसकोट नगरपालिका–१० का ३२ वर्षीय रामबहादुर कामी, सोही नगरपालिकाको वडा नम्बर ३ का ३२ वर्षीय निशान भनिने आदेश भण्डारी र वडा नम्बर ५ का ३८ वर्षीय तिलक भण्डारी छन्।

त्यस्तै सल्यानको कुमाख गाउँपालिका–५ का २८ वर्षीय रेशम राना, जाजरकोटको नलगाड नगरपालिका–९ का १९ वर्षीय कैलाश भनिने कपिल परियार र बारेकोट गाउँपालिका–१ का २५ वर्षीय यज्ञ विक पनि फरार भएका छन्।

डोल्पाको त्रिपुरासुन्दरी नगरपालिका–७ का २९ वर्षीय कालीप्रसाद रोकाया र वडा नम्बर ४ का २८ वर्षीय धनबहादुर भनिने हरिबहादुर बुढा पनि फरार हुनेमा छन्।

उनीहरू शनिबार बिहान कारागारबाट सुरुङ खनेर फरार भएका हुन्। प्रहरीले उनीहरुको खोजी गरिरहेको छ । जिल्ला प्रशासन कार्यालयले कैदी फरार भएको घटनामा छानबिन गरिरहेको छ । झन्डै चार मिटर लामो सुरुङ खनेर कैदीहरु फरार भएका थिए ।

शनिबार बिहान कैदी गणना गर्दा आठ जना नपुगेपछि मात्र उनीहरु फरार भएको कुरा खुलेको थियो ।