नेपाल सेयरधनी संघले आधारभूत सेयरधनीले ५ प्रतिशत वा सोभन्दा बढी सेयर बिक्री गर्नुअघि १५ दिन अगावै सार्वजनिक सूचना दिनुपर्ने व्यवस्थामा संशोधन गर्न नेपाल धितोपत्र बोर्ड (सेबोन)सँग माग गरेको छ।
संघले २०८३ असोज १८ गते जारी गरेको विज्ञप्तिमार्फत २०८३ भदौ ९ गते सेबोनले जारी गरेको पत्रको बुँदा नम्बर १ मा रहेको व्यवस्थाप्रति आफ्नो धारणा सार्वजनिक गरेको हो। उक्त व्यवस्थाअनुसार सूचीकृत कम्पनीका आधारभूत सेयरधनीले ५ प्रतिशत वा सोभन्दा बढी सेयर बिक्री गर्नुभन्दा १५ दिनअघि सार्वजनिक सूचना जारी गर्नुपर्ने व्यवस्था गरिएको छ।
संघले सेयर बिक्रीसम्बन्धी गतिविधिमा पारदर्शिता आवश्यक रहेको सिद्धान्तसँग आफू सहमत रहेको जनाएको छ। तर दोस्रो बजारबाट सेयर खरिद गरी आधारभूत सेयरधनी बनेका लगानीकर्तालाई समेत यही व्यवस्था लागू गर्दा साना लगानीकर्ता र समग्र बजारमा अनावश्यक असर पर्न सक्ने संघको दाबी छ।
संघका अनुसार ठूलो परिमाणमा सेयर बिक्री गर्नुअघि सार्वजनिक सूचना दिँदा बजारमा बिक्रीको हल्ला फैलिन सक्ने र त्यसले लगानीकर्ताको मनोविज्ञानमा असर पार्न सक्छ। "ठूला लगानीकर्ता भाग्दैछन्" भन्ने धारणा बनेमा राम्रो वित्तीय अवस्था भएका कम्पनीको सेयर मूल्यसमेत हल्लाकै आधारमा घट्न सक्ने र त्यसको प्रत्यक्ष असर साना लगानीकर्तामा पर्ने संघको भनाइ छ।
संघले बजारमा संस्थागत पारदर्शिता बढाउनुपर्ने भए पनि त्यसको सुरुवात ठूलो परिमाणमा सेयर बिक्री गर्ने संस्थागत तथा प्रमोटर लगानीकर्ताबाट हुनुपर्ने धारणा राखेको छ। बजारमा ठूलो आपूर्ति आउन सक्ने अवस्थालाई व्यवस्थापन गर्न संस्थागत लगानीकर्ताको सेयर बिक्रीलाई पारदर्शी र पूर्वसूचनामा आधारित बनाउनुपर्ने संघको माग छ।
संघले सेबोनसँग २०८३ भदौ ९ गतेको पत्रको बुँदा नम्बर १ तत्काल संशोधन गर्न माग गरेको छ। दोस्रो बजारबाट सेयर खरिद गरेर आधारभूत सेयरधनी बनेका सेयरधनीको हकमा १५ दिनअघि सार्वजनिक सूचना दिनुपर्ने व्यवस्था लागू नहुने विषय स्पष्ट पार्न संघले आग्रह गरेको छ।
त्यसैगरी संस्थागत लगानीकर्ताका हकमा भने पूर्वसूचनाको व्यवस्था कायम राख्नुपर्ने संघको माग छ। संस्थागत लगानीकर्ताले सेयर बिक्री गर्ने निर्णय गरेको १५ दिनअघि सेबोन र नेपाल स्टक एक्सचेन्ज (नेप्से)मा पूर्वसूचना पेश गर्नुपर्ने व्यवस्था गर्नुपर्ने संघले जनाएको छ।
बजारमा एकैपटक ठूलो परिमाणमा सेयर आपूर्ति नआओस् भन्ने उद्देश्यले ठूलो सेयर बिक्रीलाई चरणबद्ध गर्ने सीमा तोक्नसमेत संघले माग गरेको छ।
नेपाल सेयरधनी संघका महासचिव सुरज खड्काद्वारा जारी विज्ञप्तिमा पुँजी बजार संरक्षण र साना लगानीकर्ताको हितलाई प्राथमिकतामा राखेर नियम संशोधन गर्न सेबोनसँग आग्रह गरिएको छ।
(177).png)
