प्रशासनले बाढी तथा पहिरोको उच्च जोखिमलाई मध्यनजर गर्दै भैँसे–भीमफेदी–देउकाली–कुलेखानी हुँदै काठमाडौं जोड्ने सडकखण्डमा आज साँझ ५ बजेदेखि भोलि बिहान ५ बजेसम्म सवारी आवागमन पूर्ण रूपमा रोक लगाएको छ ।
काठमाडौँ — लगातार वर्षाका कारण कुलेखानी जलाशयको पानीको सतह खतराको तह पार गर्न सक्ने अवस्था देखिएपछि जिल्ला प्रशासन कार्यालय मकवानपुरले उच्च सतर्कता अपनाउन आग्रह गरेको छ । प्रशासनले जलाशय आसपासका बासिन्दालाई सुरक्षित रहन र काठमाडौं जोड्ने सडकखण्डमा यातायात सञ्चालनमा रोक लगाएको छ ।
जिल्ला प्रशासन कार्यालय मकवानपुरले शनिबार जारी गरेको सूचनाअनुसार आज दिउँसो ४ बजेसम्म कुलेखानी जलाशयको जलसतह १५२९ मिटर पुग्न सक्ने अनुमान छ । निरन्तर वर्षाका कारण जलाशयको सतह थप बढ्न सक्ने र बाँधका मुख्य गेटहरू खोल्नुपर्ने अवस्था आउन सक्ने पनि प्रशासनको भनाइ छ ।
मुलुककै ठूलो जलाशययुक्त कुलेखानी जलविद्युत् आयोजनाको जलाधार क्षेत्रमा शनिबार बिहानदेखि निरन्तर वर्षा भइरहेको छ ।कुलेखानी जलाशयमा १ हजार ५ सय ३० मिटर पानी अट्ने क्षमता छ । जलाशय भरिनुभन्दा अगाडि बाँध खोल्नुपर्ने अवस्था आउन सक्ने जोखिमलाई मध्यजनर गर्दै आयोजनाले साइरनको व्यवस्थासमेत गरेको छ। तल्लो तटीय भाग सिस्नेरी लगायतका क्षेत्रमा साइरन जडान गरिएको छ । जलाशयको बाँधमा पानीको सतह १ हजार ५ सय २९ मिटर पुगेपछि पहिलो साइरन बज्ने व्यवस्था छ ।
बाँधका मुख्य गेटहरू खोल्नुपर्ने अवस्था आएमा मुख्य जोखिम मकवानपुरको तल्लो तटीय क्षेत्र (सिस्नेरी खोला/बागमती नदी किनार) मा पानीको बहाव आकस्मिक रूपमा बढ्न सक्ने प्रशासनले जनाएको छ ।
प्रशासनले नदी किनारमा नजान, नुहाउन तथा माछा मार्न नहुने र सुरक्षित स्थानमा रहन सम्बन्धित क्षेत्रका बासिन्दालाई अनुरोध गरेको छ । साथै बाढी तथा पहिरोको उच्च जोखिमलाई मध्यनजर गर्दै भैँसे–भीमफेदी–देउकाली–कुलेखानी हुँदै काठमाडौं जोड्ने सडकखण्डमा आज साँझ ५ बजेदेखि भोलि बिहान ५ बजेसम्म सवारी आवागमन पूर्ण रूपमा रोक लगाइएको छ ।
प्रशासनले सो अवधिमा अत्यावश्यकबाहेकका सवारीसाधन सञ्चालन नगर्न र यात्रा गर्नुअघि सम्बन्धित निकायबाट जानकारी लिनसमेत आग्रह गरेको छ।
