शुक्रबार बेलुकीदेखि परेको वर्षापछि दोभान खोलामा आएको बाढीले खोला तर्ने क्रममा चन्दलाई बगाएको हुन सक्ने प्रहरीको अनुमान छ।
सल्यान — सल्यानमा खोलामा एक पुरुषको शव फेला परेको छ। जिल्लाको दार्मा गाउँपालिका–३ फारुला बजार नजिकै दोभान खोलामा शनिबार बिहान ३२ वर्षीय भुवन चन्दको शव भेटिएको हो ।
दोभान खोलामा चन्दको शव कोल्टे परेको अवस्थामा फेला परेको जिल्ला प्रहरी कार्यालय सल्यानका सूचना अधिकारी प्रहरी निरीक्षक ईश्वरी रोकायले बताए। खोलामा पुरुषको शव भेटिएपछि प्रहरी टोली घटनास्थलमा पुगेर अनुसन्धान गरिरहेको उनले जानकारी दिए ।
शुक्रबार बेलुकीदेखि वर्षा भइरहेको र दोभान खोलामा बाढी आएकोले खोला तर्ने क्रममा बगाएर उनको मृत्यु भएको हुन सक्ने रोकायले बताए ।
विप्लव महर्जन कान्तिपुरका सल्यान संवाददाता हुन् ।
