भोटेकोशी बाढीपीडितलाई फुङलिङ नगरको ३४ लाख सहयोग

रसुवाको भोटेकोशीमा आएको विनाशकारी बाढीबाट प्रभावित नागरिकको उद्धार, राहत तथा पुनःस्थापनाका लागि ताप्लेजुङको फुङलिङ नगरपालिकाले ३४ लाख रुपैयाँभन्दा बढी सहयोग गरेको छ। नगरपालिकाले जनप्रतिनिधि, कर्मचारी, शिक्षक तथा विद्यालय कर्मचारीबाट संकलित ३४ लाख ११ हजार ६६० रुपैयाँ ८७ पैसा प्रधानमन्त्री दैवी प्रकोप उद्धार कोषमा जम्मा गरेको हो।

फुङलिङ नगरपालिकाका प्रमुख प्रशासकीय अधिकृत मोहनलाल पनेरुका अनुसार जनप्रतिनिधिबाट एक लाख ७३ हजार ४९० रुपैयाँ, कर्मचारीबाट आठ लाख १९ हजार ६५० रुपैयाँ तथा शिक्षक र विद्यालय कर्मचारीबाट २४ लाख १८ हजार ५२० रुपैयाँ ८७ पैसा संकलन भएको हो।

बाढीबाट ठूलो जनधनको क्षति भएपछि देशका विभिन्न स्थानीय तह, सरकारी निकाय, संघसंस्था र सर्वसाधारणले राहत कोषमा सहयोग गर्ने क्रम जारी राखेका छन्। आफ्नो क्षेत्रभन्दा टाढा विपद्मा परेका नागरिकको उद्धार र पुनःस्थापनाका लागि स्थानीय तहहरूले जनप्रतिनिधि तथा कर्मचारीको पारिश्रमिक र विपद् व्यवस्थापन कोषबाट समेत रकम जुटाएर सहयोग गरिरहेका छन्।

यसअघि बाढीपीडितको सहयोगका लागि कपिलवस्तुका छ स्थानीय तहले मात्रै दुई करोड २५ लाख १३ हजार रुपैयाँ प्रधानमन्त्री दैवी प्रकोप उद्धार कोषमा जम्मा गर्ने निर्णय गरेका थिए। कपिलवस्तु नगरपालिकाले ५१ लाख ११ हजार, वाणगंगा नगरपालिकाले ४५ लाख, बुद्धभूमि नगरपालिकाले ४३ लाख ४५ हजार, शिवराज नगरपालिकाले ३८ लाख ५७ हजार र महाराजगञ्ज नगरपालिकाले ३७ लाख रुपैयाँ सहयोग गर्ने निर्णय गरेका थिए।

त्यस्तै, बझाङको खप्तडछान्ना गाउँपालिकाले २६ लाख ३८ हजार ८२७ रुपैयाँ र सिन्धुलीको हरिहरपुरगढी गाउँपालिकाले २५ लाख १६ हजार २५२ रुपैयाँ सहयोग गर्ने निर्णय गरेका थिए। बझाङकै मष्टा गाउँपालिकाले २२ लाख ६४ हजार १७९ रुपैयाँ सहयोग गर्ने निर्णय गरेको थियो। दार्चुलाको मार्मा गाउँपालिकाले पनि आफ्नो विपद् व्यवस्थापन कोषबाट दुई लाख ५१ हजार रुपैयाँ सहयोग गर्ने निर्णय गरेको थियो।

यसरी विभिन्न स्थानीय तहले जनप्रतिनिधि, कर्मचारी, शिक्षक तथा आफ्नै विपद् व्यवस्थापन कोषबाट रकम जुटाएर बाढीपीडितलाई सहयोग गरिरहेका छन्। कतिपय स्थानीय तहले रकम कोषमा जम्मा गरिसकेका छन् भने कतिपयले जम्मा गर्ने निर्णय गरेका छन्।

अर्थ मन्त्रालयको कात्तिक १० गतेसम्मको अद्यावधिक विवरणअनुसार प्रधानमन्त्री दैवी प्रकोप उद्धार कोषमा विभिन्न माध्यमबाट कुल १७ अर्ब ६३ करोड १७ लाख ३२ हजार ५१ रुपैयाँ बराबरको सहयोग प्राप्त भएको छ। यसमा बैंकिङ माध्यमबाट प्राप्त रकम, संस्थागत तथा व्यक्तिगत सहयोग र विदेशी सहायता समावेश छन्।

सरकारले पनि बाढी प्रभावित क्षेत्रका १५ स्थानीय तहलाई १३ करोड ५० लाख रुपैयाँ नगद सहयोग उपलब्ध गराएको छ। त्यस्तै, रसुवा जिल्लालाई एक करोड, नुवाकोटलाई एक करोड र धादिङलाई ५० लाख रुपैयाँ उपलब्ध गराइएको सरकारी विवरणमा उल्लेख छ।

भोटेकोशी बाढीबाट प्रभावित नागरिकको तत्कालीन उद्धार र राहतसँगै दीर्घकालीन पुनःस्थापनाका लागि ठूलो स्रोत आवश्यक पर्ने भएकाले सहयोग संकलन र परिचालनलाई पारदर्शी बनाउनुपर्ने आवाजसमेत उठिरहेको छ।

प्रकाशित: १३ कार्तिक २०८३ १८:१२ शुक्रबार