गत १० भदौको भोटेकोशी बाढीपछि अवरुद्ध तातोपानी नाका दसैंको अवसरमा ३ दिनका लागि ठूला मालवाहक सवारी साधन सञ्चालन गर्न खुला गरिएको थियो ।
काठमाडौं — १० भदौमा रसुवामा गएको भोटेकोशी बाढीले क्षति पुर्याएको रसुवागढी नाकाको पुनःनिर्माण तथा सिन्धुपाल्चोकको तातोपानी नाकालाई नियमित रुपमा सञ्चालनमा ल्याउन अन्तरमन्त्रालय समन्वय र कूटनीतिक पहल तीव्र पारिएको परराष्ट्र मन्त्रालयले जनाएको छ ।
मन्त्रालयले शुक्रबार आयोजित नियमित प्रेस ब्रिफिङमा यस्तो जानकारी दिएको हो । यसका लागि परराष्ट्र मन्त्रालयका प्रवक्ता लोकबहादुर क्षेत्रीले नेपाल-चीन जोड्ने मुख्य व्यापारिक नाका सञ्चालनमा ल्याउन बिहीबार परराष्ट्रमन्त्री शिशिर खनालसहित सम्बन्धित विभाग तथा मन्त्रालयका प्रतिनिधिबीच अन्तरमन्त्रालय समन्वय बैठक सम्पन्न भएको बताए । उनकाअनुसार बैठकमा भोटेकोशी नदीमा आएको विनाशकारी बाढीले रसुवागढी नाकामा पुर्याएको क्षतिको मूल्यांकन, पुनःनिर्माणलगायतका विषयमा छलफल भएको छ ।
यसअघि गत १० भदौको बाढीपछि अवरुद्ध तातोपानी नाका दसैंको अवसरमा ३ दिनका लागि ठूला मालवाहक सवारी साधन सञ्चालन गर्न खुला गरिएको थियो ।
उनले भने, ‘गत १० भदौमा रसुवाको भोटेकोशी नदीमा आएको विनाशकारी बाढीपश्चात अवरुद्ध नेपाल र चीन जोड्ने तातोपानी नाकाबाट ठूला मालवाहक सवारी साधन वडा दसैंको अवसरमा ३ दिनको लागि खुला गरिएको थियो । यो कुरा अवगत नै छ । यसैगरी २६ अगस्ट २०२६ मा भोटेकोशी नदीमा आएको विनाशकारी बाढीले रसुवागढी नाकामा पुर्याएको क्षतिको मूल्यांकन गरी उक्त नाकालाई पुनः सञ्चालनमा ल्याउन पुनः निर्माण लगायतका विषयमा छलफल गर्न र अन्य नाकाहरु खुलाउने विषयमा सम्बन्धित विभाग तथा मन्त्रालयहरुसँग परराष्ट्रमन्त्रीको उपस्थितिमा अन्तरमन्त्रालय समन्वय बैठक सम्पन्न भएको छ । चीनसँगका नाकाहरू खुलाउने सम्बन्धमा मन्त्रालयमार्फत नियमित समन्वय भइ नै रहेको छ ।’
प्रवक्ता क्षेत्रीले दक्षिण पूर्वी एसियाली देशहरूमा सञ्चालित अनलाइन स्क्यामिङ फसेका नेपाली नागरिकको उद्धारका लागि समेत आवश्यक पहल र समन्वय भइरहेको जानकारी दिए ।
(175).png)
