१५औं महाधिवेशन सम्पन्नपछि बिहीबार बसेको पहिलो केन्द्रीय कार्यसमिति बैठकले 'हामी तयार छौैं' अभियानलाई स्थानीय तहसम्म लैजाने निर्णय गरेको महामन्त्री प्रदीप पौडेलले बताए ।
काठमाडौं — आगामी स्थानीय र प्रदेश तहको निर्वाचनलाई लक्षित गर्दै कांग्रेसले मंसिर महिनाभर ‘हामी तयार छौं’ अभियान चलाउने भएको छ । १५औं महाधिवेशन सम्पन्नपछि बिहीबार बसेको पहिलो केन्द्रीय कार्यसमिति बैठकले यस्तो अभियानलाई स्थानीय तहसम्म लैजाने निर्णय गरेको महामन्त्री प्रदीप पौडेलले बताए ।
उनका अनुसार यस अभियानअन्तर्गत चुनावका लागि, प्रभावकारी प्रतिपक्ष भूमिकाका लागि, राष्ट्रिय समस्याहरू हल गर्न, आपसी समन्वयात्मक राजनीतिका लागि, संविधान कार्यान्वयन गर्ने प्रक्रियामा सहकार्य गर्नलगायतका सबै राष्ट्रिय आवश्यकताको मुद्दामा कांग्रेस तयार छ भन्ने अभियान चलाउन खोजिएको हो ।
‘यो अभियानलाई ७५३ पालिकामै लैजाने हाम्रो तयारी छ’ महामन्त्री पौडेलले भने,‘यसअन्तर्गत एउटा राजनीतिक अभियान हुनेछ । अर्को सामाजिक अभियानसँग जोडिने छौं ।’ जलवायु परिवर्तनको विषयलाई समेत जागरण अभियानका रुपमा जोडिन लागिएको उनले बताए ।
‘खासगरी प्रतिपक्षीय भूमिका प्रभावकारी बनाउने, प्रदेश र स्थानीय तहका सरकारलाई जनमुखी कार्यक्रम गर्न लगाउने र पार्टी संगठनलाई सामाजिक अभियानसँग जोड्ने र प्राथमिकताहरू प्रष्ट गर्ने बिषयसँग अभियान जोडिएको छ,’ पौडेलले भने ।
