युद्ध चर्किएपछि इरानले गर्नसक्ने सम्भावित प्रत्याक्रमणलाई लिएर तयार रहन अमेरिकाले आफ्ना पश्चिम एशियाली सहयोगीहरुलाई आग्रह गरेको छ
काठमाडौँ — आगामी साता हुने मध्यावधि चुनावपछि इरानमाथि पुनः नयाँ सैन्य कारबाही गर्ने तयारी अमेरिकाले गरेको छ । युद्ध सुरु हुनसक्ने भन्दै पश्चिम एशियाका सहयोगी देशहरुलाई अमेरिकाले सचेत रहन पनि आग्रह गरेको छ ।
दुई कूटनीतिज्ञले एशोसिएटेड प्रेस (एपी) सँगको कुराकानीमा यस विषयको खुलासा गरेका हुन् । तर, उनीहरुले नाम छाप्न भने अस्विकार गरे । उनीहरुका अनुसार युद्ध चर्किएपछि इरानले गर्नसक्ने सम्भावित प्रत्याक्रमणलाई लिएर तयार रहन पश्चिम एशियाली सहयोगीहरुलाई आग्रह गरिएको छ । ह्वाइट हाउस र अमेरिकी अधिकारीहरूले भने यस विषयमा कुनै पनि टिप्पणी गर्न अस्वीकार गरेका छन् ।
अमेरिकी राष्ट्रपति डोनाल्ड ट्रम्पले इरानमाथि नयाँ हवाई आक्रमण गर्ने वा नगर्ने भन्नेबारे हालसम्म कुनै अन्तिम निर्णय भने गरिसकेका छैनन् । यद्यपि, अमेरिकामा महत्वपूर्ण मानिएको नोभेम्बर ३ को निर्वाचन समाप्त हुनासाथ नयाँ सैन्य कारबाहीको आदेश दिन सकिने संकेत ट्रम्पले बारम्बार गरिरहेका छन् ।
इरानका विदेशमन्त्री अब्बास अराग्चीले बुधबार सामाजिक सञ्जाल ‘एक्स’ मा एक पोष्ट लेख्दै तेहरानले “कूटनीतिलाई सफल बनाउन खोजेको बताएका छन् । उनले मध्यस्थकर्ताहरुमार्फत अमेरिकासँग कुराकानी भइरहेको बताएका छन् ।
यसैबीच, संयुक्त अरब इमिरेट्स (यूएई) को परराष्ट्र मन्त्रालयले एक वक्तव्य जारी गर्दै दुवै पक्षलाई संयमता अपनाउन र तनाव कम गर्न आग्रह गरेको छ । युद्धको राजनीतिक समाधानको बाटो खोज्न पनि मन्त्रालयले आग्रह गरेको छ ।
अमेरिकी अधिकारीहरूले क्षेत्रीय सहयोगीहरूलाई नयाँ चरणको सैन्य कारबाही केही दिनसम्म लम्बिन सक्ने बताएका छन् ।
तर, इरान र उसका निकटका समूहहरूले प्रतिशोध लिन सक्ने र त्यसले अझ लामो समयसम्म द्वन्द्व लम्ब्याउन सक्ने भन्दै क्षेत्रीय अधिकारीहरूलाई सतर्कता अपनाउन आग्रह गरिएको छ । इरानले ऊर्जा पूर्वाधारसहित महत्वपूर्ण पूर्वाधारहरुलाई निशाना बनाउनसक्ने चेतावनी पनि अमेरिकाले आफ्ना सहयोगीहरुलाई दिएको छ ।
