अर्नव चक्रवातका कारण मेघगर्जन, चट्याङ र हावाहुरीसहितको वर्षाले जनजीवन, कृषि तथा यातायात प्रभावित हुनसक्ने प्रशासनले जनाएको छ।
भक्तपुर — जिल्ला प्रशासन कार्यालय भक्तपुरले आजदेखि कात्तिक १४ गतेसम्म मौसम प्रतिकूल रहने सम्भावना रहेकाले कृषि कार्यदेखि यात्रासम्म सावधानी अपनाउन आग्रह गरेको छ ।
सम्भावित भारी वर्षा, बाढी, पहिरो तथा डुबानको जोखिमलाई मध्यनजर गर्दै जिल्ला प्रशासन कार्यालय भक्तपुरले उच्च सतर्कता अपनाउन आग्रह गरेको हो । प्रशासनले नदी तथा खोलाको किनारमा बसोबास गर्ने नागरिक, पहिरोको जोखिममा रहेका बस्तीका बासिन्दा, किसान, यात्रु तथा सर्वसाधारणलाई विशेष सावधानी अपनाउन आग्रह गरेको प्रमुख जिल्ला अधिकारी बिनोदकुमार खड्काले जानकारी दिए ।
मौसम विज्ञान विभागले कात्तिक ९ गते जारी गरेको विशेष मौसमी बुलेटिनका आधारमा कात्तिक १२ गतेदेखि १४ गते शनिबारसम्म देशका विभिन्न स्थानमा मौसम प्रतिकूल रहन सक्ने जनाएको छ ।
बंगालको खाडीमा बनेको अर्नव चक्रवातका कारण मेघगर्जन, चट्याङ तथा हावाहुरीसहित मध्यमदेखि भारी वर्षा हुने सम्भावना रहेकाले जनजीवन, कृषि क्षेत्र, सडक यातायात तथा भौतिक संरचनामा असर पर्न सक्ने भन्दै समयमै सतर्कता अपनाउनु आवश्यक रहेको जनाएको छ ।
भारी वर्षाका कारण नदी तथा खोलामा पानीको बहाव तीव्र रूपमा बढ्न सक्ने र तटीय क्षेत्रमा आकस्मिक बाढी तथा डुबानको जोखिम रहन सक्ने प्रशासनले जनाएको छ ।
वर्षाका कारण खेतबारीमा पानी जम्ने, काटिएको धान भिज्ने तथा कृषि उपजमा क्षति पुग्ने सम्भावना रहेकाले किसानलाई मौसमको पूर्वानुमानलाई ध्यानमा राखेर कृषि कार्यको व्यवस्थापन गर्नसमेत आग्रह गरिएको छ ।
मौसम प्रतिकूल रहने सम्भावनालाई ध्यानमा राख्दै प्रशासनले पर्यटकलाई उच्च पहाडी तथा हिमाली क्षेत्रमा नयाँ पदयात्रा नगर्न र सुरक्षित स्थानमा रहन अनुरोध गरेको छ ।
सुन्दर शिल्पकार कान्तिपुर मिडिया ग्रुपका भक्तपुर संवाददाता हुन् ।
