चुनावबाट प्राप्त ठूलो जनमतलाई स्पष्ट कार्यसूची र प्रभावकारी शासनमा रूपान्तरण गर्न नसके सरकारप्रतिको जनविश्वास कमजोर हुन सक्ने राजनीतिक विश्लेषक लालको विश्लेषण छ ।
काठमाडौँ — राजनीतिक विश्लेषक सीके लाल ले प्रधानमन्त्री वालेन्द्र शाह नेतृत्वको सरकारको कार्यशैली, व्यवस्थापन क्षमता र राजनीतिक भविष्यप्रति प्रश्न उठाएका छन् । चुनावबाट प्राप्त ठूलो जनमतलाई स्पष्ट कार्यसूची र प्रभावकारी शासनमा रूपान्तरण गर्न नसके सरकारप्रतिको जनविश्वास कमजोर हुन सक्ने उनको विश्लेषण छ ।
पत्रकार सुधीर शर्मासँग ‘अनि, अब’ कार्यक्रमको कुराकानीमा लालले सरकारसँग भ्रष्टाचार नियन्त्रण र भाइभतिजावाद अन्त्यजस्ता लोकप्रिय नारा भए पनि तिनलाई कार्यान्वयन गर्ने स्पष्ट कार्यसूची नदेखिएको बताएका हुन् । उनका अनुसार सरकारमा पुग्नुअघि पर्याप्त गृहकार्य नहुनु र प्राप्त जनमत व्यवस्थापन गर्न नसक्नु अहिलेको नेतृत्वका चुनौती हुन् ।
‘अहिलेसम्म यो सरकार वा दलले जनतासामु त्यस्तो कार्यसूची ल्याउन सकेको मलाई लाग्दैन,’ उनले भने ।
लालले प्रधानमन्त्री शाहको कार्यशैलीमा जनतासँग संवाद र सम्पर्कको कमी देखिएको बताए । प्रधानमन्त्रीले आफ्ना समर्थकको मात्रै नभई देशका सबै वर्ग र समुदायको हितमा काम गर्नुपर्ने उनको भनाइ छ । सार्वजनिक रूपमा कम देखिने शैलीभन्दा पनि सरकारले कामबाट कस्तो परिणाम दिन्छ भन्ने महत्त्वपूर्ण हुने उनले बताए ।
‘आजको युगमा सम्राटको शैलीमा शासन चलाउन खोजेको जस्तो देखिन्छ,’ उनले भने ।
उनका अनुसार रास्वपा पनि अझै संस्थागत राजनीतिक दलका रूपमा विकास भइसकेको छैन । राजनीतिक समूहबाट बलियो संगठन र संस्थामा रूपान्तरण हुन नसक्दा सरकार सञ्चालनमा समेत समस्या आउन सक्ने उनले बताए ।
प्रधानमन्त्रीको इन्जिनियरिङ पृष्ठभूमि र विकासको अवधारणाबारे टिप्पणी गर्दै लालले प्राविधिक सोचले मात्रै देशका जटिल समस्या समाधान नहुने बताए । नेपालको भौगोलिक अवस्था, सीमित स्रोत र सामाजिक संरचनाअनुसार योजना बनाएर कार्यान्वयन गर्नुपर्ने उनको भनाइ छ ।
सरकारको भविष्यबारे लालले जनताको दैनिक जीवनमा सुधार ल्याउनुलाई सबैभन्दा महत्त्वपूर्ण मानेका छन् । सरकारी सेवा सहज बनाउने, रोजगारी सिर्जना गर्ने, लगानीको वातावरण सुधार्ने र नागरिकको विश्वास जित्ने कामले मात्रै सरकारको वैधानिकता बलियो बनाउने उनको विश्लेषण छ ।
‘सरकारी कार्यालयमा सहज रूपमा काम होस् । सार्वजनिक जीवनका व्यक्तिहरूको जीवनशैली हाम्रोभन्दा धेरै फरक नहोस्,’ उनले भने, ‘यस्ता साना कुरा मात्रै गर्न सकियो भने पनि कार्यसम्पादन वैधानिकता प्राप्त हुन्छ ।’
जेन-जी आन्दोलनपछिको राजनीतिक अवस्थालाई उल्लेख गर्दै लालले जनतामा आशा र अपेक्षा बढे पनि त्यसलाई उपलब्धिमा बदल्न नसके निराशा बढ्न सक्ने बताए । उनका अनुसार चुनावी बहुमत र लोकप्रियताले मात्रै सरकारको भविष्य सुनिश्चित गर्दैन । स्पष्ट कार्यसूची, संस्थागत क्षमता र परिणाममुखी कार्यसम्पादनले नै जनविश्वास टिकाउन सक्छ ।
