स्वदेशी तथा विदेशी पर्यटकको भीड लाग्ने यो क्षेत्रमा आवतजावतमा सहजताका लागि पुल निर्माण गरिएको हो ।
४ हजार ७ सय ८० मिटर उचाइमा रहेको फक्ताङलुङ गाउँपालिका–६ को लोनाक खोलामा काठेपुल निर्माण गरिएको छ । स्वदेशी तथा विदेशी पर्यटकको भीड लाग्ने यो क्षेत्रमा आवतजावतमा सहजताका लागि पुल निर्माण गरिएको हो ।
कञ्चनजंघा संरक्षण क्षेत्र व्यवस्थापन परिषद्को नेतृत्वमा काठेपुल निर्माण भएको फक्ताङलुङ गाउँपालिकाका कार्यपालिका सदस्य एवं पर्यटन व्यवसायी तेन्जिङसेराप शेर्पाले जानकारी दिए ।
कञ्चनजंघा क्षेत्रको भ्रमण गर्ने पर्यटक तथा चौँरीपालकलाई आवतजावतमा सहजता होस् भन्ने उद्देश्यसहित काठेपुल निर्माण गरिएको परिषद्ले जनाएको छ । काठेपुलमा पदयात्रा गर्नका साथै याक, खच्चर हिँडाउन पनि सहज भएको स्थानीय नुपु शेर्पाले बताए ।
श्रमदानसमेत परिचालन गरी निर्माण गरिएको पुलको लागत यकिन भइनसकेको परिषद्ले जनाएको छ ।
व्यवसायी शेर्पाका अनुसार पर्यटकीय याम सुरु भएकाले फ्रान्स, जर्मनी, बेलायत, चीनलगायतका देशबाट विदेशी पर्यटक कञ्चनजंघा क्षेत्रको भ्रमणमा आउन थालेका छन् ।
आनन्द गौतम कान्तिपुरका ताप्लेजुङ संवाददाता हुन् ।
