११ कात्तिक, काठमाडौं । नेपाली कांग्रेसका पूर्वसभापति शेरबहादुर देउवाको समूहको रोल्पा जिल्ला अधिवेशनबाट मानबहादुर खत्री सभापतिमा निर्वाचित भएका छन् ।
अधिवेशनबाट खत्री सर्वसम्मत सभापतिमा निर्वाचित भएका हुन् । अधिवेशनबाट उपसभापतिमा श्रीकुमारी घर्ती मगर र देवेन्द्र बोहरा चयन भएका छन् । सचिवमा लीलाधर आचार्य र दुर्योधन राना तथा सह–सचिवमा झपेन्द्र विष्ट र गणबहादुर वली सर्वसम्मत भएका छन् ।
उनका अनुसार सदस्यहरूमा इश्वरी खत्री, अमृतबहादुर बुढा, मोहनलाल घर्ती र रेखा नेपालीलाई चयन गरिएको छ ।
रोल्पा प्रदेश सभा निर्वाचन क्षेत्र नं. १ को क्षेत्रीय सभापतिमा कृष्ण खड्का र प्रदेश सभा निर्वाचन क्षेत्र नं. २ को क्षेत्रीय सभापतिमा तीर्थराज वली सर्वसम्मत निर्वाचित भएका छन् ।
देउवा समूहले यसअघि डोटी, बैतडी, डोल्पा, हुम्ला, जुम्ला, मुगु, कालिकोट, रुकुम पश्चिम र संखुवासभामा अधिवेशन सम्पन्न गरिसकेको छ ।
देउवा समूहको १७–१८ भदौमा बसेको बैठकले १५औं केन्द्रीय महाधिवेशन २१–२३ मंसिरमा गर्ने निर्णय गरेको थियो ।
