.jpeg)
नेपालमा कूटनीतिक आतिथ्य सत्कारको आफ्नै परम्परा छ। विदेशी राजदूतलाई स्वागत गर्दा नेपालको मौलिक कला, संस्कृति र ऐतिहासिक पहिचान झल्काउने शैली अपनाउने गरिन्छ। यही परम्पराको झल्को देखियो, इन्डोनेसियाकी अवैतानिक राजदूत लिस्टियोवाती राष्ट्रपति रामचन्द्र पौडेलसमक्ष ओहोदाको प्रमाणपत्र पेस गर्न शीतलनिवास पुग्दा।
नेपालका लागि गैरआवासीय राजदूतका रूपमा कार्यरत लिस्टियोवातीलाई व्यवसायी चन्द्र ढकालले लाजिम्पाटदेखि राष्ट्रपति कार्यालय शीतलनिवाससम्म परम्परागत बग्गीमा चढाएर पुर्याएका थिए। आधुनिक सवारीसाधनको प्रयोग सहज भए पनि औपचारिक कूटनीतिक अवसरमा बग्गीको प्रयोगले भ्रमणलाई परम्परा र सांस्कृतिक पहिचानसँग जोडेको थियो।
बग्गीमा सवार भएर शीतलनिवास पुगेकी राजदूत लिस्टियोवातीको यो यात्रा केवल आवागमनमा सीमित थिएन। यसले नेपालले विदेशी कूटनीतिज्ञलाई आफ्नो मौलिक शैलीमा स्वागत गर्ने अभ्यासलाई पनि देखाएको छ ।
घोडाले तानेको परम्परागत बग्गी, औपचारिक कूटनीतिक समारोह र नेपालको सांस्कृतिक पहिचानको संयोजनले स्वागतलाई थप आकर्षक बनाएको थियो।
अवैतानिक राजदूतका रूपमा कार्यरत लिस्टियोवातीको स्वागतमा अपनाइएको यो शैलीले नेपालको परम्परागत आतिथ्य सत्कारलाई कूटनीतिक सम्बन्धसँग जोडेको छ। यस्ता अवसरमा प्रस्तुत गरिने सांस्कृतिक झल्कोले विदेशी पाहुनालाई नेपालको इतिहास, मौलिकता र परम्पराबारे परिचित गराउनुका साथै देशको सांस्कृतिक पहिचान प्रवर्द्धन गर्नसमेत सहयोग पुर्याउँछ।
प्रकाशित: २८ आश्विन २०८३ १६:५५ बुधबार
