विराटनगरले जित नजिक पुगे पनि चितवनविरुद्ध अन्तिम चरणमा लगातार विकेट गुमायो, जसलाई कप्तानले ब्याटरका गलत सट छनोटको परिणाम माने।
काठमाडौँ — खेल पूर्णतः आफ्नो नियन्त्रणमा रहेर पनि त्यसलाई गुमाएपछि विराटनगर किंग्सका कप्तान सन्दीप लामिछानेले निराशा पोखेका छन् । नेपाल प्रिमियर लिग (एनपीएल) तेस्रो सिजनको मंगलबार भएको खेलमा सन्दीपको विराटनगर चितवन राइनोजको हातबाट आठ रनले पराजित भएको हो ।
जितका लागि १ सय ५८ रन पछ्याएको विराटनगर १९.३ ओभरमा १ सय ४९ अलआउट भएको हो । पोस्टम्याच कन्फ्रेन्समा सन्दीपले भने, ‘जे भयो, हुनु नपर्ने थियो । खेल सुरुदेखि अन्त्यसम्म हाम्रो नियन्त्रणमै थियो । तर हामीले अन्तिम पाँच विकेट निकै सस्तोमा गुमायौं ।’
उनले थपे, ‘आजको खेलबाट हामीले धेरै सिक्नुपर्छ । जति बेलासम्म खेल सकिन्न, त्यति बेलासम्म जित्छौं भनेर ढुक्क हुन सकिँदैन भनेको यही हो । आजको पिच खासै सजिलो पनि थिएन । तर हाम्रा ब्याटरको केही सट खेल्ने निर्णय सही रहेनन् । अब हामीले सकारात्मक भएर अगाडिको खेल खेल्नुपर्नेछ ।’
नेपाली राष्ट्रिय टिमका कप्तानसमेत रहेका सन्दीपले चितवनले राम्रो खेलेको भन्दा आफ्नो टिमले खराब खेलेको पनि विश्लेषण पोखे । यस्तै, चितवनका कमल सिंह ऐरी आफ्नो टिमको जितमा खुसी भए र उनले पिचले आफ्नो टिमलाई सहयोग गरेको बताए ।
उनले भने, ‘हामीले आफ्नो योजनाअनुसार बलिङ गर्न सक्यौं । बलिङका क्रममा केही दबाब पनि भयो, तर अनुशासित ढंगले बलिङ गर्यौं जस्तो लाग्छ ।’ उनले चितवनका लागि महत्त्वपूर्ण चार विकेट लिए र ‘प्लेयर अफ द म्याच’ पनि भए ।
