१ कात्तिकमा काठमाडौंबाट खोटाङतर्फ गइरहेको सुमो सुनकोशीमा खसेपछि बेपत्ता भएका हरि पुर्कोटी र अप्सरा राईको शव फेला परेको हो ।
खोटाङ — १० दिनअघि भएको जिप (टाटा सुमो) दुर्घटनामा सुनकोशी नदीमा बेपत्ता ३ मध्ये २ जनाको शव फेला परेको छ । १ कात्तिकमा काठमाडौंबाट खोटाङ आउँदै गरेको को१ज २९७६ नम्बरको सुमो सिन्धुली फिक्कल गाउँपालिका–६ नागथानस्थित मध्यपहाडी लोकमार्गबाट सुनकोशीमा खसेको थियो । घटनामा बेपत्ता दिक्तेल रूपाकोट मझुवागढी नगरपालिका–५ लफ्याङका ३० वर्षीय हरि पुर्कोटी र २२ वर्षीया अप्सरा राईको शव सोमबार फेला परेको हो ।
जिल्ला प्रहरी कार्यालय खोटाङका सूचना अधिकारी प्रहरी निरीक्षक निराजन बस्नेतका अनुसार पुर्कुटीको शव कटारीस्थित सुनकोशीमा र राईको शव सुनसरीस्थित सप्तकोशीमा फेला परेको हो । उनीहरूसँगै बेपत्ता भएका २६ वर्षीय रोशन मुग्रातीको शव भने अझै फेला परेको छैन ।
उक्त घटनामा लफ्याङ दुभेकी २१ वर्षीया युपना राई, १९ वर्षीया काब्या राई र खोटेहाङ गाउँपालिका–६ इन्द्रेणीपोखरी घर भइ दिक्तेल बस्दै आएकी १६ वर्षीया स्वस्तिका विश्वकर्माको मृत्यु भएको छ । गाडीमा सवार १० मध्ये ३ को मृत्यु, ३ बेपत्ता र ४ जना घाइते भएका थिए ।
डम्बरसिं राई कान्तिपुरका खोटाङ संवाददाता हुन् ।
