चितवनमा बस-माइक्रोबस-ट्रक ठोक्किँदा १० जना घाइते

काठमाडौँबाट मुग्लिनतर्फ जाँदै गरेको माइक्रोबसलाई विपरीत दिशाबाट आउँदै गरेको बसले ठक्कर दिएको थियो । अनियन्त्रित बसले सोही दिशातर्फ जाँदै गरेको ट्रकलाई ठक्कर दिँदा दुर्घटना भएको हो ।

चितवन — चितवनको इच्छाकामना गाउँपालिका–४ धारापानीस्थित पृथ्वी राजमार्गमा बस, माइक्रोबस र ट्रक आपसमा ठोक्किँदा १० जना घाइते भएका छन्।

प्रहरी चौकी कुरिनटारका अनुसार मंगलबार बिहान करिब ९ः२० बजे काठमाडौँबाट मुग्लिनतर्फ जाँदै गरेको बागमती प्रदेश ०३–००१ ज १२५९ नम्बरको माइक्रोबसलाई विपरीत दिशाबाट आउँदै गरेको बागमती प्रदेश ०३–००१ ख २७७७ नम्बरको बसले ठक्कर दिएको थियो। ठक्करपछि अनियन्त्रित भएको बसले सोही दिशातर्फ जाँदै गरेको प्रदेश १–०२–००२ ख ६१३ नम्बरको ट्रकलाई ठक्कर दिँदा दुर्घटना भएको हो ।

घाइते हुनेमा बाराको निजगढ निवासी ४२ वर्षीय कुमार जोशी, पूर्वी नवलपुरको कावासोती नगरपालिका–३ निवासी ३८ वर्षीय खेमबहादुर गुरुङ र ४२ वर्षीय मुराबहादुर कुमाल रहेका छन्। जोशीको टाउकोमा तथा गुरुङ र कुमालको दायाँ खुट्टामा चोट लागेको छ।

त्यस्तै, झापाको दमक नगरपालिका–३ निवासी ४८ वर्षीया कल्पना पोखरेल र बिर्तामोड नगरपालिका–५ निवासी २२ वर्षीय रोमन भट्टराई पनि घाइते भएका छन्। पोखरेलको शरीरमा बाहिरी चोट नदेखिएको र भट्टराईको दायाँ आँखामाथि चोट लागेको जनाइएको छ। सबै घाइतेको अवस्था सामान्य रहेको छ। - हिरालाल गुरूङ/नेपाल फोटो लाइब्रेरी

नेपाल यो नेपालका फोटो पत्रकारहरुले सञ्चालनमा ल्याएको फोटो एजेन्सी हो।