महादेव पोखरेलले सञ्चालन गरेको होटलमा विद्युत् तार सर्ट भएर आगलागी भएको आशंका गरिएको छ, क्षतिको विवरण आउन बाँकी छ।
अर्घाखाँची — सदरमुकाम सन्धिखर्कस्थित बैंक रोडमा रहेको एक घरमा आगलागी भएको छ । महादेव पोखरेलले सञ्चालन गर्दै आएको पोखरेल होटलको घरमा एक्कासि आगलागी भएको हो ।
सुरक्षाकर्मी र स्थानीयको पहलमा अहिले आगो नियन्त्रणमा आएको छ । घरभित्रका सबै सामान पूर्ण रूपमा क्षति भएका छन् । बिजुलीको तार सर्ट भएर आगलागी भएको हुन सक्ने प्रहरी नायव उपरीक्षक दिवस जिसीले बताए ।
सेना, प्रहरी र सशस्त्र प्रहरीले आगो नियन्त्रणमा लिएपछि सँगै जोडिएका अन्य घर सुरक्षित रहेका छन् ।
आगलागीबाट घरमा कति क्षति भयो भन्ने यकिन छैन । पोखरेलले आफ्नो कच्ची घरमा केही वर्षदेखि होटल सञ्चालन गर्दै आएका थिए ।
वीरेन्द्र केसी कान्तिपुरका अर्घाखाँची संवाददाता हुन् ।
