मेक्सिकोकी राष्ट्रपति क्लाउडिया शेइन्बमले राष्ट्रपति लुलाको विजयलाई लोकतन्त्रको जीतका रुपमा व्याख्या गरेकी छिन्
काठमाडौँ — ब्राजिलको राष्ट्रपति पदमा लुइज इनासिओ लुला दा सिल्भा चौथो कार्यकालका लागि विजयी भएका छन् । ल्याटिन अमेरिकाको वामपन्थी राजनीतिक वृत्तमा लुला एक सम्मानित व्यक्तित्व मानिन्छन् ।
निर्वाचनको अन्तिम परिणाम सार्वजनिक भएलगत्तै विभिन्न राष्ट्रप्रमुख तथा बामपन्थी नेताहरूले सामाजिक सञ्जालमार्फत लुलालाई बधाई दिएका छन् ।
मेक्सिकोकी राष्ट्रपति क्लाउडिया शेइन्बमले राष्ट्रपति लुलाको विजयलाई लोकतन्त्रको जीतका रुपमा व्याख्या गरेकी छिन् ।
त्यसैगरी, क्युबाका राष्ट्रपति मिगुएल डियाज–कानेलले पनि लुलालाई बधाई दिएका छन् । उनले ल्याटिन अमेरिका र क्यारिबियन क्षेत्रको एकता तथा सुदृढीकरणमा ब्राजिललाई क्युवाले सधैं साथ दिने बताएका छन् । अर्जेन्टिनाकी पूर्वराष्ट्रपति क्रिस्टिना किर्चनरले पनि लुलालाई बधाई दिएकी छिन् ।
ब्राजिलसँग मित्रतापूर्ण सम्बन्ध राख्दै आएका देशहरु चिली, इक्वेडर, बोलिभिया र पेरुका राष्ट्रप्रमुखले पनि उनलाई बधाई सन्देश पठाएका छन् ।
चिलीका राष्ट्रपति जोस एन्टोनियो कास्टल, इक्वेडेरका राष्ट्रपति डैनियल नोबोआ, पेरुकी राष्ट्रपति केइको फुजिमोरी, बोलिभियाका राष्ट्रपति रोड्रिगो पाज, अमेरिकी सिनेटर बर्नी स्यान्डर्सलगायतले पनि उनलाई बधाई दिएका छन् । ‘लुलाले ब्राजिलका मजदुर र लोकतन्त्रको पक्षमा दृढतापूर्वक उभिने काम गरेका छन् । आगामी चार वर्षसम्म पनि उनले यो निरन्तरता दिनेछन्,’ स्यान्डर्सले भनेका छन् ।
दक्षिणपन्थी धारका उम्मेदवार फ्लाभिया बोल्सेनारोलाई हराएर लुला राष्ट्रपति चुनिएका हुन् । बोल्सेनारोले चुनावमा धाँधली भएको भन्दै यसविरुद्ध अदालत जाने बताएका छन् । चुनावअघि बोल्सेनारोका पक्षमा अमेरिकी राष्ट्रपति डोनल्ड ट्रम्पले खुलेर समर्थन गरेका थिए । उता, लुलाले आफ्नो देशको आन्तरिक मामिलामा अमेरिकाले हस्तक्षेप गर्न खोजेको आरोप लगाएका थिए ।
