छनोट प्रतियोगितामा कर्णाली प्रदेशका ७ जिल्लाका खेलाडी सहभागी छन् ।
सल्यान — १०औं राष्ट्रिय खेलकुद प्रतियोगिताका लागि खेलाडी छनोट गर्न कर्णाली प्रदेशस्तरीय टेबलटेनिस छनोट प्रतियोगिता सल्यानमा सुरु भएको छ । प्रतियोगितामा कर्णाली प्रदेशका ७ जिल्लाका खेलाडी सहभागी भएका छन् ।
प्रतियोगितामा जाजरकोट, हुम्ला, सल्यान, सुर्खेत, दैलेख, कालीकोट र रुकुम पश्चिमका खेलाडीले प्रतिस्पर्धा गरिरहेका छन् । प्रतियोगिताबाट छनोट हुने खेलाडीले आगामी मंसिरमा सुर्खेतमा आयोजना हुने १०औं राष्ट्रिय खेलकुद प्रतियोगितामा कर्णाली प्रदेशको प्रतिनिधित्व गर्नेछन् ।
प्रतियोगिताको उद्घाटन गर्दै कर्णाली प्रदेश सभा सदस्य सुरेश अधिकारीले प्रदेशमा खेलकुदको विकास र खेलाडीको क्षमता अभिवृद्धिका लागि आवश्यक पहल गर्न प्रतिबद्ध रहेको बताए । उनले खेलमैदान तथा खेलकुद पूर्वाधार निर्माण, खेल सामग्री उपलब्धता, नियमित प्रशिक्षण र दक्ष प्रशिक्षकको व्यवस्थाका लागि नीतिगत पहल गर्ने बताए ।
खेलकुदलाई प्रदेशको नीति तथा बजेटमा प्राथमिकता दिनुपर्नेमा जोड दिँदै अधिकारीले प्रतिभावान् खेलाडीको पहिचान, प्रोत्साहन र विकासका लागि आवश्यक वातावरण बनाउनुपर्ने बताए । विशेषगरी ग्रामीण तथा दुर्गम क्षेत्रका खेलाडीलाई प्रशिक्षण, खेल सामग्री र प्रतियोगितामा सहभागी हुने अवसर उपलब्ध गराउन सके प्रदेशबाट राष्ट्रियस्तरका खेलाडी उत्पादन गर्न सहयोग पुग्ने उनको भनाइ थियो ।
